27 يناير 2015
عشان نشرح هي داعش انتشرت ليه في العراق, هحاول ابسط الموضوع في كام نقطة سريعة:
- صدام سني و كان ماسك البلد بيد من الحديد و النار و كان مبهدل الشيعة اللي تعدادهم تقريبا نص تعداد العراق و النص الباقي اغلبه سنة و أديان اخري زي المسيحية و اليزيدية و غيرها. الشيعة كانوا تحت ظلم كبير منه و عشان كده رحبوا بالغزو الأمريكي عشان يخلصوا من صدام و فعلا مسكوا الحكم.
- لما الشيعة مسكوا الحكم, عملوا نفس غلطة صدام و ظلموا السنة على حساب الشيعة و عشان كده كانت فيه فترات كتير بنسمع عن تفجيرات في مناطق الشيعة بيقوم بيها ناس من السنة. مع استمرار التفجيرات و القبض على ناس كتير من السنة, اتعرف الناس دي على الظباط من نظام صدام اللي كانوا في نفس السجون و دول كونوا أساس جماعة داعش.
- داعش سنة و وجودها في المناطق العراقية السنية مرحب بيه تماما و سكان المناطق دي محاولوش يقاوموهم و هم بيعاملوا الناس في المناطق دي كويس و عشان كده عارفين يسيطروا على المناطق السنية في العراق.
هتقولي ممولين من برة أو أي كلام زي ده, هقولك إن لو فيه تمويل خارجي و الشعب متماسك و عنده ولاء لبلده اللي بتحترمه و بتديه حقه, مكانش هيرحب بجماعة ارهابية و كان هيحاربهم زي ما الأكراد بيحاربوا داعش باستماتة دلوقتي.
كلمة السر هي العدل و المساواة. مش هتعرف تحققهم, توقع الاختراق بمعاونة الطرف الواقع تحت ظلم و دي نصيحة لرجال النظام المصري الحالي اللي ماشيين على نفس طريق الحكام العرب الظلمة اللي وصلوا بلادهم للانهيار.
No comments:
Post a Comment