لماذا ارفض الدولة الدينية أو ذات الخلفية الدينية؟

15 نوفمبر 2013

أنا عارف إني هتكلم في موضوع حساس شوية بس أعمل إيه بقى, مبعرفش امسك نفسي. يا ريت اللي هايقرا الكلام ده يفتح مخه معايا قوي و يفكر فيه بالراحة مع نفسه.

الموضوع هو ليه أنا كواحد مش مسلم استحالة هقبل بدولة دينية وفي حالتنا دي الدولة الدينية هي الدولة الإسلامية. الفكرة بكل بساطة إني مقتنع إني مواطن ليَّ كامل حقوقي زي أي مواطن تاني في بلد المفروض إنها تحترم الجميع وتعامل الجميع سواء بدون تمييز لأي سبب من الأسباب.

هيجي واحد ويقولي الإسلام مقالش كده, والإسلام دين عدل ومساواه وأنا فعلا مصدقه, بس في كذا نقطة كلنا واخدين بالنا منها ومظنش إننا هنختلف فيها:

- لما تحصل مشكلة بين واحد مسلم وواحد غير مسلم, دايما القانون بيجي في صف المسلم أو على الأقل مش بيعامل المسلم زي الغير مسلم.السبب إن في ناس بتفسر ايات من القرآن أو أحاديث بتأيد كلامهم والأدلة كتير على ده
- الدولة بتلم ضرايب من الناس كلها وبتخصص جزء من الفلوس دي عشان الدعوة للدين الإسلامي اللي هو معناه التبشير بالدين الإسلامي في حين إنها بتحاكم أي حد يحاول يبشر بأي دين غير الإسلام جوه البلد مع العلم إنها مش دافعة حاجة من ميزانية الدولة. من وجهة نظري ده تمييز صريح ضد أي حد مش مسلم.
- موضوع بناء دور العبادة ده موضوع كبير قتل بحثا وهناك آراء فقهية بتقول إن ممنوع بناء أي دور عبادة في دولة اسلامية. هتقولي ده مش بيحصل بس طول مااحنا سايبين التفسير لأي إنسان أو جهة, ممكن يجي عليَّ اليوم اللي يجي فيها واحد متشدد ويفسر الدين على مزاجه ويحرمني من حق طبيعي ليَّ
- التلفيزيون الرسمي للدولة فيه برامج بتطلع تنتقد في اعتقادات الناس الغير مسلمين ومبتديش الفرصة لأي واحد غير مسلم يعبر عن رأيه بحرية زي المسلمين اللي بينتقدوا الأخرين
- في امثلة تانية بس مش هو ده المهم.

هيجي واحد يقولي بس الناس المش مسلمين زمان كانوا عايشين كويس وماكانش حاسين إن في تمييز أو إنهم اقل من المسلمين, ودي نقطة احب اوضحها:
- أولا, زمان ماكانش في مفهوم الدولة الحديثة اللي فيها كل الناس سواء والرئيس أو الحكومة هي ناس من الشعب عشان تخدم الشعب. كان الملك أو الخليفة أو الحاكم هو صاحب البلد واوامره هي اللي بتتنفذ. لو كان الحاكم ده راجل كويس, الناس هتعيش كويس, لو الحكم ده ظالم, الناس هتعيش في ظلم. وكل واحد على حسب تفسيره للدين
- ثانيا, ماحدش يعرف رأي غير المسلمين زمان كان إيه في الحكم الإسلامي عشان ماكانش في طريقة الناس تعبر بيها عن رأيها زي دلوقتي. فـأي حد متحكم في كتابة التاريخ أو وسائل الإعلام ساعتها كان بيحاول يوصل الصورة المثالية للحياه في عهده. وأكيد كلنا شفنا تزوير التاريخ حتى لغاية كام سنة فاتت. ده غير إن في ناس تانية كتبت كتابات تانية تخالف الكلام بتاع إن الناس كلها كانت مبسوطة.

ممكن واحد يقولي إنه معترف إن ممكن يجي حد مش كويس يفسر الدين بطريقة غلط وعشان كده بيحصل ظلم, وأنا معاه مليون في المية والحل من وجهة نظري إننا منخليش تفسير رجال الدين يخش في القانون اللي بيحكم الناس ونخلي قانون ناس تحطه هو اللي يحكم الناس كلها بنفس المعيار عشان لو في أي لحظة لقينا إن قانون معيَّن مش شامل أو محتاج تغيير لأي سبب زي اكتشاف أي نظرية جديدة أو اختراع أي تكنولوجيا جديدة, مانرجعش لرجل الدين عشان يفسر لينا هنعمل إيه وساعتها هنبقى تحت رحمته ويا يكون ابن حلال أو يكون مش ابن حلال.

أنا عارف إن كلامي ده مش مقنع لناس كتير, بس حبيت أوضح ليه الغالبية العظمى من الغير مسلمين ضد الدولة الدينية أو حتى المسمى الشيك بتاع الدولة المدنية القائمة على الشريعة الإسلامية.

طيب لو افترضنا إن أنا مسلم, إيه اللي هيخليني اقتنع بكلام الأقلية طالما إن مفيش ضرر عليَّ, الصراحة الإجابة سهلة:
- المسلمين نفسهم شايفين إن في فئات معينة بتاخد تمييز عن فئات معينة من المسلمين برضه. يعني في عهد الحكم العسكري, كان السلفيين وأي حد بدقن مش واخد حقه زي المسلم اللي بيقولوا عليه معتدل, ولما جه الإخوان, اتقلبت الحكاية. وفي كل وقت هتلاقي الشيخ اللي يبرر التمييز ده زي ماشفنا كلنا. أيام مرسي, جاب شيوخ تكفر أي حد معارض لحكم مرسي, ولما مرسي مشي, جه علي جمعة وطلع الإخوان خوارج وحلل قتلهم.

من كل ماسبق, أنا مقتنع إن الدين مش الحل, وإن الحل هو العدل والمساواة بين الجميع ووضع معيار واحد لكل الناس عشان الدنيا تمشي كويس زي أي بلد طبيعية في العالم.

https://www.facebook.com/fkhair/posts/10153470009935029