10 ديسمبر 2014
رسالة صغيرة جدا للناس اللي بتهاجم أي حد بينتقد أي شيء غلط بحجة إنه هيهز استقرار البلد و الناس اللي شايفة إن مفيش استقرار في البلد و عايزة الدنيا تستقر, أحب ابشر الناس دي إن البلد احوالها مستقرة جدا و الاستقرار متحقق بمعدلات عالية جدا.
تعريف الاستقرار هو البقاء في نفس الحالة و ده للعلم وضع البلد حاليا. البلد طول عمرها على ايد النظام الحالي (اللي متغيرش من سنين طويلة) محافظ على استقرار البلد في حالة الهبوط لأسفل و التراجع للخلف على كل المستويات.
حضرتك البلد بقالها سنين مستقرة في بلاعة بتشدها لتحت على طول الخط. يمكن معدلات الهبوط زادت الفترة اللي فاتت بس دي نتيجة طبيعية لقانون الجاذبية اللي بيقول إن السرعة الهبوط بتزيد مع الوقت.
استمرار الحالة السيئة هو استقرار سعادتك. و للعلم, الناس اللي بتحاول تغير الحالة دي هي الناس اللي عايزة تغير حالة الهبوط في الاتجاه المعاكس و بتحاول تستخدم أي طرق في ايدها عشان تغير الحالة البائسة دي.
#البلد_مستقرة_من_سنين_طويلة_على_فكرة
No comments:
Post a Comment