بقينا شحاتين من أنصاف الدول - تعليقا على تسريب السيسي بخصوص دول الخليج

7 فبراير 2015

بمناسبة التسريب الاخير اللي طلع فيه السيسي شخصيا و هو بيتكلم مع ملك التسريبات اللواء عباس كامل عن دول الخليج و كلمة الكابتن عباس عن دول الخليج و وصفهم بأنصاف الدول, افتكرت تجربتي السريعة التي لا تتعدي بضعة اسابيع في السعودية عشان اخلص مشروع قامت به شركتي مع الحكومة السعودية. 

المشروع اللي كنت شغال فيه كان عبارة عن فكرة جديدة قدمتها وزارة الاتصالات و المعلومات السعودية حتى تسهل عملية ادخال البيانات اللي بتتم في فترة نهاية السنة المالية في وزارة المالية. 

مدير المشروع كان شاب سعودي من وزارة الاتصالات و كان دوري في المشروع ده هو إني اجمع كل المعلومات المطلوبة عشان نبني البرنامج المطلوب و كان وقتي في الكام أسبوع اللي قضيتهم في السعودية مقسم ما بين وزارة الاتصالات و وزارة المالية. 

الشخص اللي كنت بتعامل معاه في وزارة الاتصالات كان هذا الشاب السعودي اللي اتذكره بكل خير بصراحة. الشاب ده كان على قدر عالي جدا من الاحترام في التعامل معايا و أذهلني علمه و اتقانه للغة الانجليزية و اتقانه لعمله و مدى الحرفية في أداء عمله بعكس ما رأيته في وزارة المالية اللي كان كل من تعاملت معهم من الموظفين كبار السن اللي تقريبا مش بيعملوا أي حاجة في شغلهم و وقتهم مقسم ما بين الاكل و أي حاجة تانية يضيعوا بيها وقت الدوام و وجدت صعوبة كبيرة في الحصول على المعلومات المطلوبة. 

مكنتش فاهم ليه الفرق الكبير بين اللي شفته في وزارة الاتصالات و وزارة المالية لغاية فترة قريبة لما عرفت إن دول الخليج قررت إنها تعلم الجيل الجديد تعليم على أعلى مستوى و قررت إنها تبعت الشباب بتاعهم لارقى الجامعات في دول العالم المتقدم زي امريكا و كندا و اوروبا و بتصرف على تعليمهم بكل سخاء و عشان كده عرفوا يخلقوا جيل جديد يعي تماما تحديات العصر الحديث و يعرف قيمة العلم في الحياة العملية و يدرك ما يحدث خارج بلاده من تقدم و انفتاح, و أكيد مدير المشروع الذي عملت معه من وزارة الاتصلات كان من أحد هؤلاء الشباب المتعلم اللي رجع من الخارج و اخد مركز قيادي في حكومة بلده. 

القصة دي بحكيها عشان أرض بيها على كلام اللواء اللي لسة عايش في مية البطيخ و شايف إن الخليج انصاف دول و مش فاهم إن الدول دي اللي كانت مصر بتبعت مدرسين عشان يعلموهم زمان اصبحوا أكتر تمدنا من مصر و شبابها يملك من العلم ما لا يملكه اغلب الشباب المصري اللي بنشتكي منهم دلوقتي و شايفينه سبب نكسة مصر. 

الحقيقة إن سبب نكسة مصر هي قيادتها اللي اهملت شعبها و اهملت في تعليمه و رجعت بمصر مئات السنين  للخلف و اصبحنا شحاتين من انصاف الدول دي (في نظر اللواء الفضيحة عباس). 

احب اختم البوست ده بكام ملاحظة على التسريب (في أول تعليق): 

- التسريب ده مفيهوش أي جديد عشان كل المصريين تقريبا بيقولوا نفس الكلام اللي عباس و السيسي قالوه على دول الخليج

- اللواء عباس و السيسي عارفين إن اللي بيعملوه ده اسمه قذارة و متعايشين بصورة طبيعية مع الاسلوب ده. 

- السيسي عشان بتاع مخابرت و واعي, عامل حدق و موطي صوته و قال لعباس يعلي صوت التلفزيون عشان يغلوش على الكلام. شغل مخابرات على أعلى مستوى. 

- أيام الانتخابات, الناس حاولت تقنعني بالسيسي و كان من اهم اسبابهم هو إنه رجل دولة, أديكم شفتوا رجال الدولة بيتكلموا إزاي مع بعض. دول ولا شوية عيال قاعدين مع بعض في قهوة. ادي طريقة ادارتهم للدولة يا جدعان. 

- اخيرا, لو دول الخليج انصاف دول, أُمال مصر على ايد شوية الناس دي تبقى اسمها إيه؟؟ 

#بقينا_شحاتين_من_انصاف_الدول

#كفاية_فضايح_بقى_العملية_مش_ناقصة
#تسريبات_مكتب_السيسي

https://www.facebook.com/fkhair/posts/10155164099705029?pnref=story