Google Analytics

Wednesday 4 February 2015

نوح و الناس اللي حواليه

2 فبراير 2015

من أحد مميزات الغربة إن الانسان بيكون عنده فرصة يتعرف على ناس مختلفة من بلاد تانية غير بلده و بحكم إن المصريين قريبين للعرب عشان اللغة, بيكون التعرف على الناس من الدول العربية اسهل خاصة إن أماكن التجمعات للعرب مش كتير قوي.
طبعا لما بنقابل أي شخص عربي, بيكون اغلب الكلام على أحوال المنطقة العربية و كل واحد بيحكي عن خبرته في بلده و بنلاقي إن فيه تشابهات كتير بين الظروف في بلادنا العربية.
أكتر حاجة مثيرة للدهشة إننا قابلنا ناس من العراق كانوا موجودين في العراق قبل الفوضى اللي حصلت في العراق و بيحكوا لينا انهم و هم في العراق قبل الفوضى ماكانوش حاسين إن فيه أي مشكلة و كانوا شايفين إن الاوضاع زي الفل و مفيش مشاكل و اتفاجئوا لما حصلت احداث الفوضى في العراق.
بعد ملاحظة للّي بيتقال في الفترة الأخيرة في مصر, فهمت إن اغلب الناس مبتكونش شايفة الصورة الكبيرة و طالما حياتها ماشية بطبيعية, يبقى كل حاجة بالنسبة لهم زي الفل و بيحصلهم المفاجأة فقط لما أي حاجة في حياتهم تتأثر.
الناس اللي بيكونوا شايفين الصورة بطريقة اوسع و باصين على زوايا مختلفة من نفس الصورة بيحاولوا يحذروا بقية الناس من الفوضى القادمة بس بيكون رد فعل الناس التانية ليهم تقريبا شبه رد فعل الناس لنوح و هو بيبني فلك النجاة و بيحذرهم من الطوفان القادم.

No comments:

Post a Comment