المصريين بين الكورة و الدولة

21 فبراير 2015

لو حبيت ابسط الوضع في مصر و ردود أفعال المصريين على اللي بيحصل في البلد, هلاقي إن حال المصريين شبه مشجعين كتير بيتفرجوا على ماتش للفريق بتاعهم. 

لو تخيلنا إن مصر عبارة عن نادي كورة كبير و بيلعب ماتشات كورة و كل المصريين أعضاء في النادي ده و اغلبهم متابع ماتشات الفريق بتاعهم, هنلاقي إن المتفرجين ممكن نقسمهم كالاتى: 

1. نوع من المتفرجين زهق من فريقه اللي بيخسر على طول و بطل يتفرج على الكورة من فترة. 

2. نوع زعلان إن المدرب القديم اتشال عشان نتائجه كانت سيئة مع الفريق و عايز يبوظ ماتشات الفريق مع المدرب الجديد عشان يثبت إن المشكلة في المدرب. النوع ده ممكن يحضر الماتشات عشان يحدف طوب في الملعب و يعمل شغب عشان يبوظ الماتشات و مش بعيد يشجع الفرق المنافسة و يفرح لما فرقته تخسر. 

3. نوع مش فاهم أي حاجة و مش عارف أي لعيب في الفرقة ولا قواعد اللعبة و بيزيط في الزيطة و بيشجع اللعيبة اللي شكلها حلو و مش بيفهم أي حاجة في الكورة.الناس دي بتكون ماشية ورا معلقين من نوعية معلق الكورة اللي زي جورج سيدهم في فيلم انكل زيزو حبيبي اللي بيقول أي كلام و ممكن تلاقيه بيرزع أي كلام و الناس دي ممكن تلاقيها بتنفعل من الاثارة و تهلل لو شافت لعيب شكله حلو بيسخن على الخط او لعيب بيلعب رمية تماس عادية من نص الملعب او لعيب شاط كورة في السما بدل ما يشوطها في الجول.  

4. نوع متحمس قوي لفريقه و متابع كويس لكل أخبار فريقه و النوع ده هو اللي أنا بعتبره الجمهور الحقيقي للكورة اللي دايما تلاقيه بيتعصب و هو بيتفرج على الماتش و بيتنرفز على فريقه لما الفريق يلعب وحش و يشتم في المدرب عشان الخطة اللي بيلعب بيها مش صح من وجهة نظره و دايما عنده وجهات نظر مختلفة لتشكيل الفريق و طريقة اللعب بإعتباره متابع جيد للفريق و معرفته بتفاصيل كتير عن أحوال الفريق. النوع ده لما بيضغط على المدرب, ممكن يشيله أو يجبره على تغيير طريقة لعبه. 

الانواع دي موجودة في عالم الكورة بنسب مختلفة و لو حاولنا نعمل مقارنة بين الكورة و الحياة في مصر, هنلاقي إن الانواع دي موجودة برضه في الحياة. يعني هنلاقي:
1. الناس اللي باعت القضية و مش فارق معاها أي حاجة بتحصل في البلد.

2. الناس اللي مش طايقة الادارة المصرية الحالية و بتفرح لما تفشل و ممكن تساعد في تخريب البلد

3. ناس مش فاهمة حاجة و بتزيط ورا الاعلام اللي بيقول كلام اغلبه مالوش وجود و بتلاقيهم فرحانين بحاجات مينفعش تبقى مصدر للفرحة أو الفخر و ممكن تلاقيهم متيمين بشوية مسؤولين عشان مثلا بيقولوا كلام بطريقة معينة أو عشان شكلهم عاجبهم. 

4. ناس فاهمة قواعد الادارة السليمة و بتنتقد السلطة بغرض تصحيح مسارها و مش بتتأثر بكلام الاعلام عشان ادركت إنه اعلام غير موثوق فيه و بتحاول تعمل ضغط على السلطة عشان تصلح من أخطائها.

مشكلة مصر حاليا من وجهة نظري إن اغلب المشجعين من نوعية الناس اللي مش فاهمة حاجة و ماشية ورا كلام المذيع اللي مش فاهم حاجة ولا فاهم قواعد اللعبة صح. أتمنى إن مع الوقت تقل نسبة المجموعات التلاتة الاولى و تزيد نسبة المجموعة الرابعة.

اللي نفسي الناس تفهمه برضه إن المصريين هم من يملكون النادي و هم من يقدرون على محاسبة ادارة النادي و ليس العكس و هدف المصريين كلهم لابد ان يكون تقدم النادي بتاعهم مش تحقيق مكاسب شخصية من خلال النادي ده.

https://www.facebook.com/fkhair/posts/10155217148330029