السيسي و الماتريكس

18 ديسمبر 2014

الفيديو الاخير بتاع السيسي اللي بيخص بيه المصريين و قاعد يقول "يا مصريين" كذا مرة و بيقولهم إن النظام مينفعش يتغير و إن في اربع جهات دورها الحفاظ على النظام المصري أو الدولة المصرية و هم الاعلام و القضاء و الشرطة و الجيش بيخليني أحاول افكر هو بيكلم مين من المصريين عشان أنا شايف إن الكلام ده مستحيل يكون موجه ليا أنا أو أي حد مقتنع إن النظام الحالي نظام لا يصلح إنه يستمر.

الكلام ده فكرني بفيلم أنا بعتبره فيلم مهم قوي و هو فيلم ماتريكس "The Matrix". الفيلم ده بإختصار للّي ماشافهوش هو إنه تخيل العالم بقى عبارة عن منظومة تسيطر عليها مجموعة من الحواسب الآلية اللي استخدمت البشر في توليد طاقتها اللي بتحتاجها عشان المنظومة تستمر و ده من خلال السيطرة على عقول البشر و اعطائهم الايحاء إن حياتهم طبيعية زي اللي احنا بنعيشها بس هم في الحقيقة نايمين في غيبوبة و كل هدفهم في الحياة هو اعطاء الطاقة للمنظومة دي للاستمرار في الوجود.

الفيلم فيه تلات اطراف مهمين:

- الطرف الاول هم البشر اللي في الغيبوبة اللي فاكرين انهم عايشين عيشة كويسة بس في الحقيقة هم مش عايشين أساسا.
- الطرف التاني هم مجموعة من العملاء (Agents) التابعين للماتريكس كل هدفهم الحفاظ على الماتريكس و محاربة أي خطر يهدد المنظومة.
- الطرف التالت هم البشر اللي مش من الماتريكس أو كانوا في الماتريكس و فاقوا من الغيبوبة و بيحاولوا يحاربوا المنظومة دي.

هدف ال Agents انهم يقضوا على الطرف التالت و دايما بيستخدموا أي شخص من الطرف الاول لما يحبوا يقضوا على أي شخص من الطرف التالت اللي بيحاول يحارب المنظومة.

الوضع في أي منظومة موجودة في أي مجتمع مش مختلف كتير عن الوضع في الماتريكس. دايما فيه ناس موجودة كل هدفها في الحياة إنها تدور في ساقية زي العبيد عشان يدوروا عجلة الانتاج و يخلوا المنظومة مستمرة و دايما فيه كيانات دورها الحفاظ على المنظومة من الانهيار بس الطرف التالت مش بيكون دايما موجود أو دوره مؤثر الا في المجتمعات اللي قائمة على أنظمة فاشلة. بمعنى اخر العالم كله كده بس فيه فروقات بين ماتريكس و التانية و في الاخر الطرف الاول هو في اغلب الأحيان يمثل الاغلبية اللي عايشة بمبدأ "خدامين لقمة العيش" أو طول ما لقمة العيش موجودة و العيشة ماشية يبقى الدنيا زي الفل بالنسبة لهم.

السيسي من وجهة نظري في الفيديو ده حدد مين ال Agents اللي بتحمي المنظومة المصرية من الانهيار و هم الاعلام و القضاء و الشرطة و الجيش و السيسي نفسه من وجهة نظري بيمثل اكبر Agent اللي كان اسمه في الفيلم Agent Smith.

من وجهة نظري برضه, السيسي في الفيديو ده بيكلم الطرف الاول اللي عايش في الغيبوبة و دوره هو اعطاء الحياة للنظام المصري (اللي كل دوره حاليا هو خدمة كبار رجال الدولة و على رأسهم قيادات الجيش و غيرهم من كبار رجال الدولة). السيسي في الفيديو ده بيكلم الطرف ده و بيقولهم "يا مصريين" عشان الناس دي تحس إن أي حد مش معاهم (اللي هم أي شخص من الطرف التالت اللي عايز يغير المنظومة) هو عدو ضد الدولة وضد النظام و ميعتبرش من المصريين.

الفيديو اللي قصدي عليه في أول تعليق

https://www.facebook.com/fkhair/posts/10154925277445029