Google Analytics

Wednesday 4 February 2015

الحلم مش هيموت - عن شيماء الصباغ

26 يناير 2015

فيه كلمة فاكرها لماري دانيال قالتها في لقاء تليفزيوني عن مينا دانيال. قالت انها قبل موت مينا، كانت انسانة مهزومة و ضعيفة قدام مشاكلها. موت مينا اداها قوة غريبة و كإن روحه الثورية انتقلت ليها و قالت انها اتغيرت تماماً و ابتديت تحرر من قيود كتير كانت موجودة عليها و بقيت أقوي بكتير من قبل كده.
الكلام ده انا بحسه و بشوفه في ناس كتير حياتها بتتغير ١٨٠ درجة لما بيحصل قدامها حاجة كبيرة زي اللي شافته ماري و دي حاجة انا شخصيا اعرف أمثلة من تاريخنا القديم و الحاضر بتحصل و زي ما بنفقد ناس غالية علينا و كان عندهم احلام غالية لكل الناس، رحيلهم عن دنيانا بيدي القوة لناس اكتر و الحلم بيكبر مع الوقت.
شيماء من خلال كل اللي عرفته عنها في الكام اليوم اللي فاتوا اكيد هتكون سبب في ناس تانية تكمل مشوارها و الحلم هيكبر ان شاء الله.
اللي بكتبه ده انا عارف انه مش هيرجع اللي رحل عن دنيانا و مش هيعوض اي حد علي اللي فقده و فعلا بطلب ان ربنا يعزي أهالي و أصدقاء كل واحد بيغيب عن العالم بتاعنا زي شيماء و غيرها بس صدقوني فيه ناس كتير بترحل عن عالمنا القذر و محدش بيفتكرهم و فيه ناس ممكن مايعيشوش كتير و يفضلوا موجودين بيننا بروحهم اللي بتخلي الحلم لسة موجود.
ربنا يعزي أهل شيماء و كل اللي يعرفوها و بقولها فعلا من كل قلبي عشان حاسس بكل واحد بيفقد اي شخص عزيز عليه.
اعتبروني انسان حالم مش واقعي بس صدقوني الدنيا من هتستقر من غير ما حلم شيماء و غيرها من عيش، حرية، عدالة اجتماعية و كرامة إنسانية يتحقق. الحلم ده بعيد دلوقتي و ممكن منشوفش اليوم اللي هيتحقق فيه بس اكيد الحلم مش هيموت.

No comments:

Post a Comment