2 ديسمبر 2014
بمناسبة الأسطورة المصرية الجديدة اللي ماشية اليومين دول وهي إنه لا يجوز التعليق على احكام القضاء. أنا بصراحة مش عارف الناس بتجيب الكلام ده منين و يا ريت لو حد يجيبلي أي حاجة من الدستور المصري بيقول الكلام ده. وأنا هنا احب اوضح شوية حاجات بديهية احتمال تكون غايبة عن شوية ناس.
أولا الدستور بيقول إن الشعب هو مصدر السلطات و ده معناه إن أي سلطة في البلد موجودة لخدمة الشعب و أي جهاز من أجهزة الدولة هو خادم للشعب و لازم يحترم الشعب.
ثانيا, النائب العام اللي بيرفع قضايا ضد بعض المجرمين اللي بيتعدوا على حقوق الدولة شغلته هي انه ينوب نيابة عامة عن المجتمع في تحريك الدعوى الجزائية والادعاء فيها أمام المحكمة المختصة ويوكل في ذلك إلى مجموعة من الأشخاص يسموْن وكلاء النائب العام أو وكلاء النيابة, ده معناه إنه بيمثل المجتمع اللي أي مواطن مصري جزء منه يعني برضه شغال عند الشعب.
ثالثا, احكام القضاء من الطبيعي الاعتراض عليها من أي طرف سواء مجني عليه أو جاني. أي واحد بياخد مخالفة مرور من حقه قانونا إنه يعترض على الغرامة و ممكن الغرامة تتخفض أو لأ بس حق الاعتراض موجود و لا يقدر ان ينكره أي أحد.
رابعا, حرية التعبير مكفولة لأي مواطن بحكم الدستور اللي متوافق عليه بنسبة تاريخية تصل ل 98%, وبما اننا نريد اقامة دولة تحترم الدستور و القانون, مينفعش نقول إن حرية الرأي والتعبير شيء غلط.
خامسا ودي الاهم, لما الناس تشوف إن القضاء فاسد وممكن يحكم على 500 واحد في جلسة واحدة بالاعدام في منهم ناس مش عايشة, و لما نشوف إن واحد فاسد افسد بلد لمدة 30 سنة و يعامل افضل من أي مواطن عادي حتى وهو في السجن و نشوف إن واحد زي العادلي من اوسخ رجال الداخلية اللي جم في مصر وهو بياخد براءة, أكيد هنعرف قد إيه القضاء فاسد وقذر ولا يحترم ارادة الشعب اللي هو شغال عنده, فبالتالي أبسط رد فعل من الشعب هو عدم احترام هذا الجهاز حتى نشعر بتغير حقيقي و انحيازه للعدل و أكيد واضح حالة العدالة في مصر الفترة الأخيرة.
اخيرا, أنا عارف إن في ناس مش واصل لها موضوع إن أجهزة الدولة شغالة عند الشعب و دورها خدمة و تحقيق مطالب الشعب العادلة وعشان كده كل الكلام اللي بقوله بيعتبروه ضد الدولة مع انهم لو فهموا إن ما اطلبه هو مطلب طبيعي و مشروع, أكيد كانت الحياة هتبقى افضل بكثير و عشان دي بالذات مستحيل أي سلطة فاسدة و ديكتاتورية هتسمح بمحو جهل عامة الشعب و تعليمه حقوقه في بلده وعشان كده دور أي واحد عايز يساعد بلده هو زيادة الوعي بين الناس اللي حواليه عشان يفضل فيه أمل إن بكرة يبقى أحسن.
#صدقني_إنت_صاحب_البلد_مش_اللي_بيحكمك
#اللي_بيحكمك_شغال_عندك_مش_العكس
#من_حقك_تعترض_على_أي_حاجة_مش_عاجباك
#آه_زي_ما_بقولك_كده
No comments:
Post a Comment