12 ديسمبر 2014
الواحد من متابعته لردود أفعال الناس, بحس انهم مستغربين من حاجات بديهية المفروض يكونوا متوقعنها من غير أي استغراب أو اندهاش.
- موضوع مين بيكفر مين و ده شايف ده كافر و الكلام ده اتهرس مليون مرة قبل كده ومش فاهم وجه الاندهاش في الموضوع ده. دستور مصر العظيم بيقول إن الاسلام دين الدولة وبالتالي أي شخص يدين بأي ديانة تانية هو كافر في نظر الدولة و دي حاجة 98% من الشعب وافق عليها لما قال نعم على الدستور اللي بيجلب النعم. فين الاندهاش بقى؟؟
- موضوع إن الازهر بيطلع فتاوي و بيقول على داعش مش كفرة. برضه فين الجديد في ده؟ الاسلام عند ناس كتير هو تحقيق كام ركن اساسيين و اللي يعملهم يبقى مسلم. فين وجه الاندهاش؟؟ و للعلم كلنا عارفين إن الازهر و الكنيسة بيسمعوا كلام السيسي و لو قال إن داعش كفرة بكرة, هيطلع الازهر يقول إن داعش كفرة بس احنا مكناش واخدين بالنا امبارح. أنتم مش عارفين إنكم نور عنين السيسي و هو مسؤول عن الدين و الاخلاق في البلد ولا إيه؟؟
- موضوع تعذيب المواطنين في الاقسام و كإنه خبر عادي في صفحة المناسبات في أي مجلة ملهاش لازمة. فين وجه الاندهاش برضه؟؟ ما كل الناس عارفين إن الداخلية بتعذب أي حد ملوش ضهر و كله لمصلحة أمن مصر. أنتم مش عارفين إن الداخلية طول عمرها كده ولا إيه؟ و بعدين لو مش عاجبكم, هتبقوا ارهابيين و خونة و عايزين تهدوا البلد.
- موضوع محاكمة طفل عشان اخد 5 ارغفة عيش. إيه الجديد برضه؟ ماهو فيه بنات اتحبسوا عشان معاهم بلالين و القضاء بتاعنا شامخ و بيحكم بالاعدام على ناس ماتت من كام سنة قبل كده و بيطلع مبارك و رجالته براءة عشان الورق اللي قدامه بيقول إن مبارك بريء. فين الجديد يا جماعة؟ و بعدين ماهو الولد طلع براءة الحمد لله عشان تتأكدوا إن القضاء شامخ و زي الفل.
أي كارثة بتحصل في مصر يا ريت نتعامل معاها بطريقة عادية و لما تيجي المصيبة ناحيتنا, نتقبلها بصدر رحب زي ما تقبلنا الغلط اللي حصل في حق غيرنا و احنا ساكتين.
فيه حاجة افتكرتها حصلت معايا قبل انتخابات السيسي اللي فاتت, واحد أعرفه قاللي احنا هننتخب السيسي عشان هو كويس, بس لو حصل حاجة مش عاجبنا مش هنسكت حتى لو كان السيسي نفسه هو اللي غلطان. الله يمسيه بالخير, قاعد بيلعب كاندي كراش و بينزل نكت على الفيسبوك و مش فاضي للي بيحصل في البلد دلوقتي.
No comments:
Post a Comment