20 نوفمبر 2014
رواية 1984 لجورج أورويل من أحلى الكتب اللي قرأتها و خلتني اعذر ناس كتير أسيرة شاشات التلفزيون.
الكاتب كتب الرواية دي في الاربعينات و تخيل المستقبل هيكون شكله إيه. تخيل العالم مقسم لتلات قوى عظمى و قعد يحكي إزاي واحدة من القوى دي بتسيطر على شعبها إزاي و سرح بخياله و شاف إن القوة دي اخترعت جهاز شبه التلفيزيون موجود في كل مكان فيه الناس اللي من الطبقة المتوسطة و الجهاز ده كل هدفه إنه يراقب الناس اللي من الطبقة دي و يبث أخبار كلها موجهة بطريقة تخلي الشعب حاسس دايما انه في حالة حرب و خوف من أعداء هو خلقهم بنفسه.
مع الوقت تحولت الطبقة دي إلى اشخاص بدون تفكير بعد ما النظام اقنعهم إن التفكير جريمة و أي حد بيفكر في البلد بيمحوه من الوجود.
من ضمن احداث الرواية إن النظام ده كان في حالة حرب مع قوة من القوتين التانيين و كان كل الناس مشحونة ضد القوة دي و في حالة تعاون أو سلام مع القوة التالتة. فجأة تغير الوضع وتحول النظام لعداء القوة التالتة و سلام مع القوة التانية. أحلى حاجة بيصورها الكاتب إن الناس ماكانش عندها أي مشكلة مع التغير ده و استقبلت الخبر ده بكل طبيعية و نسيت تماما إن الوضع كان معكوس من يوم فات.
طبعا بطل الرواية كان مش فاهم هي إزاي الناس بتنسى بسرعة وطول الرواية بيحاول يستوعب إزاي الناس دي لغيت عقلها. الاجابة كانت إن النظام لازم كان يخلق عدو للناس يخافوا منه و يشحنهم ضده طول الوقت و يؤكد لهم طول الوقت إن النظام الحالي هو طوق النجاة الوحيد ليهم من العدو ده و طول الوقت يشغلهم بأي حاجة تخليهم دايما في حالة خوف و بكده يفضل النظام قوي و مسيطر على كل حاجة في البلد.
اليومين دول أنا شايف ناس عندها استغراب من التغير في العلاقات بين مصر و قطر وفجأة اصبحت قطر الاخت الصغري أو اصبح السيسي رئيس منتخب على الجزيرة, بس الواقع بيقول إن المصريين اللي تحت السيطرة مش هيشوفوا إن في أي مشكلة خالص في الموضوع وهينسوا أي حاجة اتقالت لهم عن قطر اللي كانت عايزة تهد مصر زي ما تقبلوا إن مصر تكون حليف لامريكا بعد ما اقتنعوا قبل كده إن امريكا هي اللي بتخطط لتخريب مصر.
اللي مستغرب وشايف إن اللي بيحصل هو نوع من أنواع الجنون, يا ريت يقرا الكتابين بتوع جورج أورويل "1984" و "مزرعة الحيوانات" و هيفهم الناس اللي من النوعية دي بتعمل كده ليه.
المثير للضحك ان جورج أورويل تخيل اختراعات معقدة و أجهزة متقدمة جدا تكاد تكون خيالية عشان يوصل لنفس النتيجة اللي وصلها النظام المصري عن طريق شوية مذيعين من نوعية عكاشة و أحمد موسى في وجود انفتاح رهيب على العالم الخارجي لدرجة إنك مثلا ممكن تلاقي مصريين عايشين في امريكا و مصدقين اسطورة اسر قائد الاسطول السادس الأمريكي أو إن اوباما اخواني أو إن مذكرات هيلاري كلينتون مليانة قصص من المؤامرات على مصر. الصراحة نرفع القبعة للنظام المصري العظيم اللي عرف يمحي ذاكرة و عقل اغلب الشعب المصري على مدار سنين طويلة.
No comments:
Post a Comment