داعش هي المشكلة و الحل هو الدولة العلمانية

4 فبراير 2015

مع كل حادثة من حوادث داعش الاجرامية المثيرة للجدل الدائم علي صفحات التواصل الاجتماعي، كل واحد بيحاول يبيع فكرته و بيستخدم داعش كمثال للتأكيد علي صحتها.

- فيه ناس بتستخدم اللي بتعمله داعش عشان تثبت ان الاسلام كده و لازم بلدنا تعمل زيهم
- فيه ناس بتستخدم اللي بتعمله داعش عشان تثبت ان الاسلام كده و لازم الناس تبعد عن الاسلام
- فيه ناس بتستخدم اللي بتعمله داعش عشان تثبت ان فيه مفاهيم غلط في الاسلام و عند الأزهر و لازم تتصلح
- فيه ناس بتستخدم اللي بتعمله داعش عشان تثبت لنا ان الحكم العسكري هو الحل عشان هو اقل الاختيارات ضررا

انا بقي بحاول أبيع فكرة ان مصر تفصل بين الدين و الدولة عشان نخلص من وجع الدماغ اللي موجود بسبب الصراع الغبي بين الناس اللي عندها الأفكار السابقة دي.

ايه رأيكم يا جماعة نتفق اننا نسيب الدين للإنسان يفهمه براحته و بمزاجه و نخلي الدولة تحط قانون نتفق عليه و يخدم مصالح كل الناس و نطبقه بمعيار واحد مالوش علاقة بالدين اللي واضح ان محدش هيتفق عليه؟؟

علي فكرة، دي مش فكرة انا مفتكسها من نفسي. انا غاششها من بلاد تانية عملت كده و الحمد لله بقيت ماشية كويس و ربنا مباركلهم في بلادهم و مركزين دلوقتي في حاجات بتفيد البشرية و كبروا دماغهم من وجع الدماغ اللي احنا فيه ده.

https://www.facebook.com/fkhair/posts/10155151666160029