7 يناير 2015
طبعا كل سنة لازم تيجي فترة البوستات بتاعة الجو البرد و الناس في مصر بيشتكوا من البرد و طبعا صحابهم المصريين في كندا و امريكا و اوروبا يقعدوا يتريقوا عليهم عشان الجو برة مصر بيكون اسقع بكتير من مصر.
أنا الصراحة أول سنة انقل فيها كندا كنت بتريق مع الناس اللي برة مصر على المصريين اللي جوه مصر بس بعد كده فهمت و قدرت قد إيه الناس في مصر بيتبهدلوا أكتر من الناس برة مصر بسبب انخفاض درجات الحرارة حتى لو كانت مش تحت الصفر.
الحقيقة إن فيه فرق كبير قوي بين الشتا في مصر و الشتا في أي بلد اوروبي أو امريكي و ببساطة الفرق ده هو إن البلاد دي بتكون مستعدة و جاهزة للجو ده و البنية التحتية و كل المباني مجهزة بنظام تدفئة قوي عشان الناس تعرف تعيش في درجات حرارة منخفضة ده غير إن اللبس في البلاد دي بيكون معمول بخامات مخصوصة عشان تدفي برة البيت بعكس الوضع في مصر اللي اللبس فيه مش معمول لدرجات الحرارة المنخفضة و مفيش طبعا انظمة تدفئة و عزل حراري في المباني فالسقعة بتكون في البيوت و الحرارة داخل البيت بتقل جدا بعكس البيوت في اوروبا و امريكا.
عشان نوضح الفرق, تعالى نتخيل إنسان في كندا في يوم عادي برد درجة الحرارة في الشارع 20 تحت الصفر مثلا. الشخص ده معظم وقته في البيت أو في الشغل في درجة حرارة حوالي 20 فوق الصفر و في العربية في درجة حرارة مشابهة لكده أو اقل بدرجة صغيرة و بيمشي في الشارع و هو لابس لبس شتوي محترم مغطي بيه كل جسمه تقريبا لمدة لا تتعدي النص ساعة أو الساعة في اليوم. يعني متوسط الحرارة اللي هو عايش فيه في اليوم أكتر من 18 فوق الصفر تقريبا بعكس شخص قاعد في مصر في درجة حرارة 5 فوق الصفر و البيت في درجة حرارة 8 فوق الصفر مثلا, هنلاقي إن الشخص ده عايش في متوسط حرارة يساوي 7 فوق الصفر و عشان كده بنسمع الكلام بتاع إن البرد في مصر بيخش العضم و الكلام ده اللي في كندا و امريكا و اوروبا بيتريقوا عليه بس الحقيقة إن البرد في مصر اصعب من بقية الدول اللي مجهزة للبرد الشديد.
ربنا يعدي الايام البرد دي بسرعة على المصريين و تقعدوا تذلونا بالجو الجميل قريب إن شاء الله
و كلمة على جنب للمصريين اللي في امريكا اللي بيتريقوا على الناس في مصر عشان عندهم درجة الحرارة 5 تحت الصفر: "شكلكم يضحك قوي وأنتم عمالين تتريقوا على المصريين و ليهم حق الكنديين يتريقوا عليكم لما تنزل عندكم أي عاصفة تلجية و الحياة تقف عندكم
No comments:
Post a Comment