Google Analytics

Tuesday 3 February 2015

عن عيد الميلاد

24 ديسمبر 2014

في الفترة دي, بيحتفل العالم بميلاد المسيح و طبعا معروف إن ولا يوم 25 ديسمبر ولا 7 يناير هو اليوم المضبوط لميلاد المسيح و اغلب الظن إنه اتولد ما بين شهر يونيو و سبتمبر بحسبة بسيطة بناء على كام معلومة نعرفها عن الفترة دي زي ان:
- يوحنا المعمدان غالبا اتولد في شهر يناير تقريبا عشان الحمل حصل بعد خدمة زكريا الكاهن في ابريل أو مايو.
- يوحنا المعمدان اكبر من المسيح بست شهور
اللي معروف برضه إن العالم ابتدي يحتفل بعيد ميلاد المسيح في القرن الرابع و اختاروا اليوم اللي الليل فيه أكتر فترة من اليوم كرمز إن المسيح جه عشان ينقلنا من الظلمة للنور.
الاكيد إن العالم من ساعتها ابتدي يحتفل بعيد ميلاد المسيح في الفترة دي و دي أهم حاجة لينا و في الفترة دي, الواحد بيسأل نفسه, يا ترى لو المسيح جه زي زمان, الناس هتصدقه ولا هيعملوا معاه زي اليهود اللي كانوا مستنيين ملك عظيم يملك عليهم و مقتنعوش براجل بسيط أول ما اتولد, اتولد في مزود للبقر و عاش حياة بسيطة مع أمه العدرا مريم و يوسف النجار؟؟
يا ترى, الناس هتبقى عايزاه يلبس زي الملوك و الملابس الغالية المدهبة و عايش في برج عالي بعيد عن الناس العادية ولا هتقبله و هو لابس زي الناس العادية و مصاحب كل الناس حتى الخطاة زي ما المسيح كان يعرف الزواني و العشارين و كل الخطاة؟؟
ربنا يدينا نعمة و نمشي مع المسيح الصح اللي طول عمره عايش على الارض زي الناس العادية و نبعد عن أي حاجة تبعدنا عنه أو تخلينا نرفضه عشان مش في الصورة البهية اللي على مزاجنا.
كل سنة و كل الناس طيبة بميلاد المسيح و يا رب نعرف نقول مع الملايكة "المجد لله في الأعالي و على الارض ‫‏السلام‬ و بالناس المسرة‬"

No comments:

Post a Comment