7 نوفمبر 2014
من الأخطاء اللي ناس كتير بتقع فيها (و أنا واحد منهم) إننا بنحاول نقارن بين أحوال مصر و بقية العالم المتقدم حاليا والحقيقة إن المقارنة اللي من النوع ده مقارنة ظالمة جدا و نتيجتها هو الاحباط واليأس.
الفرق من وجهة نظري مش فرق مكان أو ثقافة لأن ببساطة مصر كانت قريبة جدا من دول كتير في اوروبا في القرن التاسع عشر و اوائل القرن العشرين. الفرق حاليا بين مصر و دول اوروبا هو فرق في الزمن.
لو رجعنا وفتشتنا في تاريخ اوروبا أيام العصور الوسطى, هنلاقي إن أحوال اوروبا مش مختلفة كتير عن أحوال مصر حاليا. بالبحث السريع عن العصور الوسطى على ويكيبيديا, هنلاقي الوصف ده:
"يشار إلى هذه الفترة المبكرة بأنها العصور المظلمة، كانت القرون الأولى من العصور الوسطى، خاصة من القرن الخامس إلى أواخر القرن العاشر الميلاديين أقرب إلى أن تكون مظلمة، حيث أصيبت حضارة غربي أوروبا بالانحطاط، ولم يتبق من حضارة الرومان القدامى سوى مابقي في قلة قليلة من مدارس الأديرة والكاتدرائيات والبلاط والقصور الملكية، أما العلوم التي نقلت عن اليونانيين فقد اندثرت تقريبًا، وكان الذين تلقوا علماً فئة قليلة من الناس، كما ضاع الكثير من المهارات الفنية والتقنية القديمة، وأمسى العلماء في جهلهم، يتقبلون الحكايات الشعبية والشائعات على أنها حقيقة."
الوصف ده تقريبا شبه الوضع في مصر. هنلاقي ان مستوى التعليم في مصر هو الأخير وفقا لاخر الاحصائيات العالمية. الحكايات و الشائعات بتداول بين الناس على إنها حقائق زي كتاب هيلاري كلينتون الشهير و اسر الاسطول السادس الأمريكي. اصبح من الطبيعي إنك تجد شخص متعلم ومتخرج من كلية الطب متقبل لفكرة جهاز يقهر كل الفيروسات عن طريق تحويلها لكفتة.
الفرق الوحيد إن مصر فيها بعض مظاهر التقدم من خلال الأجهزة الحديثة المستوردة من الخارج وده بيدي ايحاء إن مصر دولة عادية ولكن في الحقيقة إن مصر بوضعها الحالي لا تختلف في جوهرها عن اوروبا في العصور الوسطى.
لو اتفقنا إن مصر حاليا تشبه اوروبا في العصور الوسطى, ممكن نعرف إيه كان مخرج اوروبا من العصور الظلامية و بداية نهضتها الصناعية. هنلاقي إن المدخل لتغيير مسار اوروبا هو التطور الثقافي و الاهتمام بالتعليم و ده اللي عمله محمد علي لما مسك حكم مصر و عمل نهضتها اللي المصريين عايشين على اطلالها الآن.
الحاجة الوحيدة المشجعة في كل الكلام ده إن مصادر الثقافة اصبحت أسهل والحصول عليها اصبح متاح للغالبية من الطبقة المتوسطة بفضل التطور التكنولوجي اللي استوردناه من الخارج و دي حاجة لا اعتقد إن هناك أي قوة تقدر تمنعها. في نفس الوقت, التغيرات في الاحوال في عصرنا هذا اصبح سريع جدا بالمقارنة بالماضي بسبب سرعة انتقال المعلومة و صعوبة اخفائها أو محوها من الذاكرة و ده يدينا امل إن التغيير هيكون اسرع من نظيره في اوروبا.
المستقبل هيكون افضل و لكن لابد من حدوث صراعات عنيفة حتى تصل مصر اللي ماوصلت إليه اوروبا.
No comments:
Post a Comment