27 نوفمبر 2014
ساعات الواحد بيسمع كلام غير منطقي من ناس كتير و بيستغرب هي الناس بتقول الكلام ده ازاي و بالصدفة فهمت هي الناس بتجيب الكلام ده منين و عرفت ان برامج التليفزيرن المختلفة بتقعد تردد الكلام ده علي طول و النتيجة بتكون ان الناس المتلفزة (اللي تحت سيطرة الجهاز العجيب) بيقتنعوا بالكلام ده من كتر ترديده قدامهم.
من الحاجات اللي كنت بسمعها من ناس كتير و مكنتش عارف هما جايبين الكلام ده منين هو موضوع ان مينفعش حد ينتقد اي شيء من غير ما يقدم الحلول للشيء اللي مش عاجبه و الا يبقي اسمه شخص سلبي و نقده هدام و بيهدم الدولة. امبارح فتحت التلفزيون بالصدفة و لقيت مذيع قد الدنيا بيقول نفس الكلام و كإنه شيء مسلم بيه و واضح ان الفكرة دي بقيت شيء طبيعي اليومين دول زي ان الليبرالية يعني أمك تقلع الحجاب او ان الشيوعية يعني الإلحاد او ان العلمانية يعني انك تبيح زواج المثليين.
بالمنطق العجيب بتاع النقد الهدام ده، يبقي اي واحد يروح مطعم و ميعجبوش، مينفعش يفتح بقه بأي كلمة وحشة عنه لو معجبوش الاكل غير لما يوضح لمدير المطعم ايه اللي المفروض المدير يعمله عشان يطلع اكل كويس.
اللي الناس لازم تفهمه ان الحكومة شغالة عند الشعب يعني دورها هو خدمة الشعب و لازم تنفذ اللي الشعب عايزه و لازم الشعب يعرف خطة عمل الحكومة لتنفيذ مطالب الشعب. يعني مثلا لما حد يقول "لابد من تفعيل القانون و القضاء علي الفساد"، مينفعش نقوله "ورينا همتك و قولنا ازاي نعمل ده" لإن الشخص ده مش في مكان مسؤول انما السؤال ده لازم يتحط قدام المسؤولين اللي في الدولة و لازم المسؤولين يردوا و يقولوا هيعملوا ايه لتحقيق مطالب الشعب الطبيعية زي العدل و المساواة و تطبيق القانون و اي مطلب عادل لأي مواطن مصري.
تخيل كده كل واحد دخل مطعم معفن و اكل اللي جاله من غير ما يفتح بقه بأي كلمة اعتراض عشان مش عارف ظروف المطعم و معندوش حلول لمشاكل المطعم، هل تتخيل ان اي حاجة هتتصلح في المطعم ده؟؟؟
#مفيش_حاجة_اسمها_نقد_هدام
#اي_انسان_من_حقه_يعترض_علي_اي_شيء_مش_عاجبه
#الحكومة_شغالة_عند_الشعب
#اه_زي_ما_بقولك_كده
No comments:
Post a Comment