9 يناير 2015
ابتديت اقرا كتاب جديد بيتكلم عن سلوك الجماهير في اوقات معينة من تاريخ الشعوب و مع أول كام صفحة في الكتاب لقيت تطابق كبير بين المكتوب في الكتاب و اللي بيحصل حوالينا من مصريين كتير على مدار الاربع سنين اللي فاتوا.
اللي بيقوله الكتاب إن في بعض الاوقات الصعبة, بيتكون فكر جمعي (Collective mind) عند مجموعات من الناس اللي بيكونوا حشد أو قطيع معين و الحشد ده بيتصرف و بـيتكلم بنفس الطريقة و نفس الاسلوب بغض النظر عن درجة تعليم و ثقافة الناس المكونة للقطيع ده و بيقول الكتاب إن الناس اللي في القطيع ده بيتصرفوا بلا وعي حقيقي أو منطق أو عقل و كل اللي بيحركهم هو المؤثرات العاطفية اللي بيكون تأثيرها وقتي و غير دائم.
الكتاب برضه بيقول إن الاشخاص المكونة للقطيع بتتصرف بطريقة مختلفة تماما لما المؤثرات دي بتختفي أو تقل و بـيرجعوا لطبيعتهم و يرجع لهم وعيهم الطبيعي.
الكلام ده مهم جدا لأي واحد بيحاول يتناقش مع أي حد داخل أي قطيع لأن المنطق في اغلب الاحوال بيكون غايب عند الناس دي و العاطفة بتكون غالبة وقت حدوث المؤثرات اللي بتحرك أي قطيع.
طبعا من مصلحة أي سلطة أو شخص في منصب عالي إنه يحافظ على الفكر الجمعي اللي يخدم مصالحه و عشان كده بنلاقي إن كل فترة المؤثرات اللي بتأثر على الناس تقل, لازم يحصل حاجات ترجع القطيع لنفس الفكر الجمعي اللي اتكون و عشان هو فكر مؤقت, لازم المؤثرات تفضل موجودة عشان يفضل نفس الشعور (اللي بيخدم مصالح السلطة أو الشخص ده) موجود لأطول فترة لخدمة مصالحه.
الكتاب ده شكله ممتع و بيفسر حاجات كتير بتحصل حوالينا و كل واحد مش عارف يفسر اللي بيشوفه بيحصل حواليه لازم يقرا الكتاب ده عشان بلاقي ناس كتير بتتكلم معايا و تقولي إنها حاسة إنها من عالم تاني أو بيكون عندها شعور إنها مش طبيعية عشان مش بتتصرف بنفس الاسلوب بتاع الاغلبية.
من الاخر, حضرتك طبيعي بس معلش, اعذر الناس التانية اللي بتتصرف بلا وعي تحت تأثير مؤثرات أقوى من احتمالهم.
ملحوظة مهمة, الاخوان هو أول قطيع تم تكوينه في مصر و هو الأداة الاهم في ايد الحاكم لتشكيل القطعان الأخرى و هو المصدر الأساسي لاكبر مؤثر عاطفي يؤثر على بقية القطعان الاخري. دي ملحوظة مهمة منعا لزيطة ملهاش لازمة من الاخوان اللي من وجهة نظري سبب رئيسي في الخيبة التقيلة اللي البلد فيها حاليا.
No comments:
Post a Comment