20 يناير 2015
للناس اللي مش فاهمة احنا ليه عاملين دوشة على أي حاجة غلط بتحصل مع انهم شايفين إن الدنيا ماشية و مفيش داعي للزيطة دي كلها طول ما هم عايشين كويس.
أنا عايز أحكي قصة سريعة ايام ما أنا كنت بقدم على الهجرة في 2008. ايامها ناس كتير كانت مستغربة أنا ليه قررت اهاجر مع اني كنت شغال كويس و بقبض مرتب كويس الحمد لله و بعمل فلوس تعتبر كويسة قوي و ناس كتير كانت بتقولي إني مش بفكر كويس و إن قرار الهجرة بالنسبة ليا مش صح. الحقيقة إني كنت قررت اهاجر لإني كنت متابع جيد لحاجات كتير بتحصل في الحياة و كنت شايف إن البلد مصممة إنها تمشي في مسار غلط من سيء لاسوء حتى لو أنا ظروفي المادية كويسة عشان أنا شايف إن الفلوس مش الضمان الوحيد عشان الانسان يعيش كويس.
كنت بحاول اقنع الناس دي إن طريقة تفكيرهم دي مش صح و إن هيجي اليوم اللي الظروف هتبقى أسوء و هم شخصيا هيكونوا مضرورين بطريقة مباشرة. و طبعا كانت الناس دي بتتعامل معايا على أساس إني مش فاهم حاجة و إن مصر طول عمرها على الحال ده و إن مصر أحسن بالنسبة لظروفي.
مكنتش اتوقع الانهيار السريع ده لمصر بعد هجرتي (و دي حاجة مضايقاني طبعا) بس اللي ملاحظه إن نفس الناس اللي كانت مستغربة من قرار هجرتي هم نفس الناس اللي عاجبهم الوضع الحالي لمصر و شايفين إن مصر ماشية كويس و برضه أنا شايف إن مصر حاليا ماشية في سكة مش صح نتايجها هتكون سيئة على الكل.
للناس دي, حاولوا تبطلوا تبصوا تحت رجليكم و ارفعوا عينكم لأعلى شوية عشان تشوفوا الصورة بطريقة اوضح شوية و يمكن بعد كده تفهموا اللي بقوله.
No comments:
Post a Comment