السيسي ديكتاتور و عاجبنا بس مينفعش نعلنها قدام العالم بس العالم عارف اللي فيها

30 مايو 2015

من خلال مناقشات مع مؤيدين للسيسي (اشيد بصدقهم)، هنلاقي انهم عارفين كل البلاوي اللي بتحصل من الدولة و غياب القانون و معندهمش مشكلة في اي حاجة غير قانونية تحصل لأي حد. يعني مثلا قضية عرب شركس، هم عارفين ان الحكم بالإعدام اتنفذ علي ناس مرتكبتش الجريمة بس معندهمش مشكلة انهم يتعدموا عشان اي سبب تاني. (ده في عرف القانون، مش قانوني بس في عرف الناس دي مفيش مشكلة)

هما برضه عارفين ان السيسي ديكتاتور و ان النظام الحالي قمعي و حجتهم ان النظام الحالي بيحارب الارهاب (الاخوان يعني) و ان الشعب جاهل و مينفعش معاه الديمقراطية دلوقتي (بط هوين بصوت عمر سليمان).

لو افترضنا ان كل الكلام ده ممكن يعدي داخليا، فالمشكلة انه مينفعش يعدي خارجيا لأن الدول الطبيعية عندها ديمقراطية و اي تعاون بينها و بين اي دول من النوع المصري (قمعي و مفيش قانون و ديكتاتوري)، بتستخدمه المعارضة للضغط علي الحكومة (اللي بتتعاون مع دولة قمعية ديكتاتورية) و شفنا مثلا اللي كتبته الصحافة الاسبانية علي الرئيس الديكتاتور السيسي لما زار اسبانيا و رد فعل رئيس البرلمان الألماني و رفضه لمقابلة السيسي لما يزور ألمانيا.

الموضوع ده بيخلق المعضلة المصرية الشهيرة. مصر لازم تبان علي انها دولة ديمقراطية قدام العالم عشان العالم يعرف يتعامل معاها من غير وجع دماغ من المعارضة اللي عندهم. للعلم، العالم معندوش مشكلة يتعامل مع الشيطان نفسه لو بيحكم مصر طالما هينفذ اللي عايزينه منه. المشكلة في وجع الدماغ من الناس اللي محبكاها و بتستخدم الموضوع ده كورقة ضغط علي الحكومات دي.

الحقيقة ان لو كان ينفع مصر تعمل دستور بيقول انها دولة حكمها فردي ديكتاتوري و مفيش سيادة للقانون و ان فيه ناس اسياد و فيه عبيد، مظنش ان اي مؤيد للنظام كان هيعترض بس للاسف فيه مؤسسات مينفعش تتعامل مع أنظمة زي دي و عشان كده لازم مصر تمثل و مؤيدي النظام يمثلوا ان الدنيا زي الفل و عشان كده هتلاقي حشد للمصريين في كل مرة الرئيس يسافر اي بلد من البلاد اللي بتحبكها.

من الاخر، مهما المؤيدين عملوا، الحقيقة واضحة زي الشمس و الكل عارف الزبالة اللي بتحصل في مصر حتي باعتراف مؤيدي النظام اللي راضيين عن اللي بيحصل و عشان كده لازم المصري المؤيد للنظام يعيش حياة منفصمة. يبقي من جواه بيحتقر الخليج بس تلاقيه مالي الدنيا بكلام ان السيسي يحترم الخليج و عارف ان السيسي ديكتاتور بس لازم ينفي الحكاية دي علي طول الخط عشان منظر مصر قدام العالم، و ده مش حاجة صعبة علي اي شخص أتولد و عاش طول حياته في ازدواجية بيعمل حاجة في الخفاء و قدام الناس بيبان بصورة معاكسة.

علي الناحية التانية، اي حد عنده اتساق مع نفسه و عنده مشكلة في الازدواجية دي، بيلاقي ان كل حاجة بتحصل حواليه جنون في جنون.

https://www.facebook.com/fkhair/posts/10155619150400029

لمحة عن السياسة في كندا

6 مايو 2015

نتكلم شوية على السياسة في كندا و غالبا الكلام ده هيمشي على بقية الدول الطبيعية بدرجة أو باخري

كندا دولة رأس مالية بس تميل لليسار يعني الجزء بتاع العدالة الاجتماعية كبير و دي من وجهة نظري شيء مهم و مفيد للمجتمع ككل.

الموضوع ده بكل بساطة إن الدولة بتقدم خدمات طبيعية للمواطنين. الخدمات دي زي الصحة و التعليم و المواصلات و خدمات ترفيهية زي اماكن لممارسة الرياضة و غيرها من الحاجات دي.

غير الخدمات دي, فيه دعم مادي الحكومة بتديه للناس على حسب حالتهم الاجتماعية و المادية. يعني الأسرة اللي فيها أطفال, الحكومة بتدفع لهم مبلغ شهري على حسب دخلهم. المبلغ ده بيتحدد على حسب عدد الاطفال اللي في الأسرة و دخل الأسرة. طبعا لما الدخل بيزيد, المبلغ ده بيقل و مع الدخول العالية, الأسرة مش بتاخد أي دعم مادي.

الأحزاب في كندا زي أي حتة طبيعية فيها احزاب يمينية (محافظة) و احزاب تميل لليسار (غالبا بتكون أكتر ليبرالية من الأحزاب المحافظة).

الأحزاب المحافظة ليها فكر بخصوص الاقتصاد و رؤيتها بتكون غالبا تتمحور حولين تقليل الأعباء عن القطاع الخاص على أساس إن لما القطاع الخاص مكسبه يزيد (عن طريق تقليل الضرائب عليه مثلا), البيزنس يكبر و يحتاج عمالة أكتر و بكدة يزيد الطلب على العمل و البطالة تقل و ناس أكتر تشتغل و يستهلكوا أكتر فعجلة الاقتصاد تدور.

على الناحية التانية, الأحزاب اللي تميل لليسار, رؤيتها للاقتصاد مختلفة شوية و تنحاز للعامة من الشعب و بتزود الضرائب على القطاع الخاص و المواطنين اللي دخلهم عالي (طبعا الضرائب تصاعدية على حسب الدخل) عشان يبقى معاها ميزانية أعلى و تعرف الحكومة تقدم خدمات و دعم أكتر المواطنين.

دايما في جدال بين الطرفين دول و كل واحد شايف إن رؤيته هي الصح. الواقع الموجود في كذا بلد و بالرجوع للاحصائيات اللي اتعملت على بلاد مختلفة, بنلاقي إن سياسة الأحزاب المحافظة في الاقتصاد بتؤدي لحاجة مش ظرفية و هي إن الغني بيزيد غني و الفقير بيزيد فقر عشان اتضح إن لما الحكومة بتقلل الضرايب على القطاع الخاص, صاحب العمل بيفرح بالفلوس الزيادة اللي جاية ليه و مش بيكبر شغله أو الزيادة في شغله مش بتكون قد الزيادة في سوق العمل.

أكتر ناس بتكون مع الأحزاب المحافظة هي الناس اللي دخلها عالي و أصحاب البيزنس بس عشان الناس دي نسبتهم أكيد اقل من عامة الشعب اللي دخله مش عالي, فبيكون حظ الأحزاب اللي بتميل لليسار أعلى من الأحزاب المحافة.

الفرق التاني ليه علاقة شوية بالاخلاق يعني مثلا المحافظين بينحازوا لناس على حساب ناس تانية زي مثلا المهاجرين اللي بيحاولوا يقللوا من اعداد المهاجرين الجدد بعكس الأحزاب اللي تميل لليسار اللي بتحاول تكسب الناس دي في صفها.

الأحزاب المحافظة بتقول انها بتحاول تحافظ على الاخلاق و العادات الكويسة و بيحاولوا يكسبوا تعاطف عامة الناس بالطريقة دي (حاجة كده شبه الأحزاب الاسلامية في مصر اللي بتخوف الناس من ضياع الهوية و الحاجات دي) و فعلا ناس كتير من العامة بتقف معاهم عشان السبب ده و غالبا بيكون الناس دي عايشة في قرى و مدن صغيرة مفيهاش ثقافات و اجناس مختلفة بعكس المدن الكبيرة اللي فيها ثقافات و اجناس مختلفة و بينحازوا للأحزاب التانية اللي بتشجع ال Multiculturalism (تنوع الثقافات).

دي معلوماتي اللي ممكن متكنش دقيقة قوي بس ده اللي وصلت له بعد كام سنة هنا في كندا. الموضوع كله بيدور حولين الفلوس في الاخر و المميزات اللي ممكن يكسبها الفرد من الحزب اللي بيدعمه.

ليه مش بتعلق على الاحداث اللي بتحصل في مصر كتير زي زمان؟

1 مايو 2015

كذا واحد اعرفه سألني في الفترة الاخيرة ليه بطلت اكتب زي زمان و بقيت بتكلم في حاجات مختلفة و سيبت التعليق علي الأحداث المختلفة اللي بتحصل في مصر زي ما كنت بعمل قبل كده.

الإجابة بكل بساطة اني مكنتش فاهم قوي الناس ازاي بتتفاعل مع الأحداث اللي بتحصل بطريقة تبان علي انها بلادة للي شايف ان الحاجات دي كوارث و بعدين مع مرور الوقت اكتشفت ان اغلب الناس دي مش فارق معاها حاجة طالما مفيش ضرر مباشر عليها حتي لو الضرر ده تأثيره بطيء و مميت علي المدي الطويل ده غير ان لما بيحصل لها اي حاجة وحشة، بتفسر ده علي انه اختبار من ربنا او اي تفسير هلامي مربوط بالدين عشان يحس ان اللي بيحصل ده عادي خاصة ان كلام الناس اللي بيثقوا فيهم من رجال الدين بيأكد علي الموضوع ده و بالتالي اي كلام من ناس عادية حتي لو منطقي مالوش مكان عند الناس دي.

اللي وصلت ليه بعد وقت ان كلامنا مش هيغير اي حاجة و ان التغيير هيحصل هيحصل بس هيحصل عن الطريق الصدام و العنف و الدم و ده حاصل حاليا و مع الوقت تحكم الدولة في أمور البلد بيقل و ده حاصل حاليا و حدة الصدام بين الأطراف هتزيد مع الوقت لغاية ما الناس تفهم ان الحياة في صراع مالهاش اي فايدة و ده طبعا بعد ما حمقة الدين تقل و يظهر تيار علماني قوي يعرف يكسب ناس جدد في صفه و يقل المعسكرين الديني و العسكري و طبعا ده مش هيحصل بسلاسة و هيكون فيه شد و جذب كتير و مع مرور الوقت هتتحلل الدولة المعفنة الموجودة حاليا.

انا شخصيا استفدت علي المستوي الشخصي من كل اللي بيحصل ده لإن اللي حصل و بيحصل ده خلاني ابص علي الحياة بمنظور مختلف و ابتديت اشوف حاجات كتيرة مكنتش واخد بالي منها قبل كده و ساعدني كل ده علي تغيير اسلوب حياتي و نظرتي للاشياء.

معرفش اذا فيه اي حد بيستفيد اي حاجة من اللي بكتبه بس اللي متأكد منه ان اللي بكتبه مفيد اكتر للناس اللي مشتركة معايا في الفكر عشان ده بيحسسهم و بيحسسني اننا مش لوحدنا في الحياة و ده بيدي دعم معنوي مفيد للإنسان.

دوري و دور الناس اللي زيي انها زي ما بتكتب علي مواقع التواصل الاجتماعي انها تحاول تحرك الدنيا في الاتجاه التالت (لا ديني لا عسكري) و كل واحد علي قد اللي يقدر عليه يعني اكيد الشخص اللي بره مصر هيكون دوره مختلف عن واحد في مصر. انا و مجموعة من الأصدقاء في المكان اللي عايشيين فيه بنحاول نعمل حاجة مفيدة ممكن في المستقبل يكون ليها قيمة و نعرف نوصل للناس في كندا ان مصر فيها تيار تالت بيحاول يظهر في مصر يقف قدام التيارين الوسخين اللي موجودين حاليا.

طبعا اغلب اللي هيقرا الكلام ده ممكن يعتبرني انسان خيالي حالم عايش في عالم مش موجود بس انا شخصيا بستفيد و اعتقد ان وجودي ممكن يفيد غيري بأي شكل من الأشكال و في الاخر كل واحد هو قطرة في محيط ماشي في اتجاه التغيير الإجباري اللي محدش هيعرف يوقفه.

اخيرا، انا شايف اني كمسيحي مش راضي عن اللي بيحصل في مصر لازم اتكلم و أوضح موقفي بصراحة عشان اغلب الناس متخيلة ان كل المسيحيين راضيين عن اللي بيحصل ده مع اني متأكد ان ده كلام فارغ و اعرف مسيحيين كتير غير راضيين بس بيخافوا يعلنوا ده عشان منظرهم قدام بقية الناس ميتأثرش بس من وجهة نظري لازم يكون مفهوم للجميع ان المسيحيين مش كتلة واحدة ماشية ورا مجموعة من الناس او بتاخد رأيها من اي حد.

https://www.facebook.com/fkhair/posts/10155491754515029?pnref=story