10 يونيو 2015
عمك محلب قالك تعالى نضحك على كام واحد و نعمل حركة من اياها و نعمل قال إيه بنزور مستشفى على فجأة عشان نتفقد سير العمل فيها, وعمل له كام منظر قال إيه الراجل اتفاجئ من اللي شافه هناك, راح الدكاترة عملوا صفحة على الفيسبوك و ابتدوا ينشروا صور للمستشفيات العامة و الوحدات الصحية عشان محدش يعمل فيها عبيط و يقول مكنتش أعرف.
قوم إيه المدرسين طلعوا انصح و قالوا احنا نسبق و نعمل صفحة للمدارس عشان محدش يعمل الفيلم ده علينا.
الحقيقة الحكومة بالحركات القرعة دي, بتثبت لينا انهم عالم زبالة مش عايزين يعترفوا بالقرف اللي هما السبب فيه. ميزانية التعليم و الصحة في مصر في ادنى مستوياتها و الجهات السيادية القذرة محدش يقدر يسأل بياخدوا كام و اخرها السيد وزير الدفاع قرر كده مع نفسه إن منشآت الجيش الاقتصادية (زي النوادى و المصايف و غيرها) مش هتدفع ضرائب.
كل الكلام ده و لسة تلاقي كام واحد مبسوط بطريق اترصف ولا كوبري جديد اتعمل و بيقول عليها إنجازات.
الانجاز الحقيقي هو رفع مستوي المواطن و اقل واجب هو الاهتمام بتعليمه و صحته عشان يكون قادر إنه يساعد نفسه و يشارك في تقدم بلده.
يلا حصل خير. اعمل نفسك اتفاجئت زي محلب و لو عايز تتعرف على مستوي الخدمات الصحية و التعليمية اللي الدولة بتقدمها لعامة الشعب, اشترك في الصفحتين دول و بلاش تتفاجئ بعد كده لما تلاقي الناس مش على نفس الدرجة من الرقي بتاعك و تقول أصل المشكلة في الشعب الجاهل.
الظريف إن الدنيا كلها عمالة تتكلم دلوقتي على الانجازات اللي حصلت في السنة الاولي لحكم السيسي و اغلبها من عينة طريق أو كوبري جديد أو حفر تفريعة لقناة السويس, هنلاقي إن المفروض ميكونش فيه أي مفاجأة لأي حد عشان كل المشروعات دي اللي الدولة و الاعلام اللي عارفين إنه شغال تطبيل للسيسي بتعتبرها إنجازات هي جزء مهم من بيزنس الجيش اللي كوش تقريبا على كل المشروعات دي سواء بأنه بيعملها بنفسه أو بيجيب شركة من الباطن تعمله و ياخد السمسرة بتاعته.
الحقيقة اللي ناس كتير عارفاها إن قيادات الجيش كل هدفهم الربح المادي لدرجة إن وزير الدفاع بنفسه طلع قانون يعفي منشآت الجيش الاقتصادية من الضرائب عشان يزود الربح اللي بيخش جيب الناس دي.
انما الدولة تصرف على تعليم الشعب و رعايته الصحية, فدي حاجة مبتجيبش فلوس مع إن أي دولة طبيعية دورها الأساسي هو خدمة المواطن و توفير ابسط حقوقه من تعليم و رعاية صحية لو فعلا عايزة تنهض بالدولة عشان من يصنع التقدم هو أفراد الشعب اللي يتمتع بصحة و تعليم محترم.
كل اللي الناس بتهلل عليه من مشروعات إنشائية معمولة عشان دي كلها فلوس داخلة جيب قيادات الجيش بس فين حقوق المواطن البسيط, هتلاقي انه مالوش أي وجود حقيقي في اولويات الدولة.
فيه جملة واحد صاحبي كان عايش في الامارات قالها ليا عن الشيخ زايد صاحب النهضة الحقيقية للإمارات لسة بترن في دماغي. الجملة اللي قالها الشيخ زايد, "نحن نبني رجال". هو ده سر النجاح, النجاح الحقيقي هو خلق اجيال متعلمة قادرة على مواكبة العصر و هم دول اللي بيكملوا المشوار.
أنا عارف إن الدولة و النظام مش فارق معاهم غير السلطة و الفلوس و كلامي ده مالوش أي معني عندهم بس قلت اشرح للناس ليه الدولة شغالة في المشروعات الانشائية بطريقة مكثفة بس متجاهلة اهم عامل في نجاح أي دولة و هو المواطنين نفسهم بتعليم و رعاية صحية محترمة.
No comments:
Post a Comment