Google Analytics

Friday, 1 May 2015

ليه مش بتعلق على الاحداث اللي بتحصل في مصر كتير زي زمان؟

1 مايو 2015

كذا واحد اعرفه سألني في الفترة الاخيرة ليه بطلت اكتب زي زمان و بقيت بتكلم في حاجات مختلفة و سيبت التعليق علي الأحداث المختلفة اللي بتحصل في مصر زي ما كنت بعمل قبل كده.

الإجابة بكل بساطة اني مكنتش فاهم قوي الناس ازاي بتتفاعل مع الأحداث اللي بتحصل بطريقة تبان علي انها بلادة للي شايف ان الحاجات دي كوارث و بعدين مع مرور الوقت اكتشفت ان اغلب الناس دي مش فارق معاها حاجة طالما مفيش ضرر مباشر عليها حتي لو الضرر ده تأثيره بطيء و مميت علي المدي الطويل ده غير ان لما بيحصل لها اي حاجة وحشة، بتفسر ده علي انه اختبار من ربنا او اي تفسير هلامي مربوط بالدين عشان يحس ان اللي بيحصل ده عادي خاصة ان كلام الناس اللي بيثقوا فيهم من رجال الدين بيأكد علي الموضوع ده و بالتالي اي كلام من ناس عادية حتي لو منطقي مالوش مكان عند الناس دي.

اللي وصلت ليه بعد وقت ان كلامنا مش هيغير اي حاجة و ان التغيير هيحصل هيحصل بس هيحصل عن الطريق الصدام و العنف و الدم و ده حاصل حاليا و مع الوقت تحكم الدولة في أمور البلد بيقل و ده حاصل حاليا و حدة الصدام بين الأطراف هتزيد مع الوقت لغاية ما الناس تفهم ان الحياة في صراع مالهاش اي فايدة و ده طبعا بعد ما حمقة الدين تقل و يظهر تيار علماني قوي يعرف يكسب ناس جدد في صفه و يقل المعسكرين الديني و العسكري و طبعا ده مش هيحصل بسلاسة و هيكون فيه شد و جذب كتير و مع مرور الوقت هتتحلل الدولة المعفنة الموجودة حاليا.

انا شخصيا استفدت علي المستوي الشخصي من كل اللي بيحصل ده لإن اللي حصل و بيحصل ده خلاني ابص علي الحياة بمنظور مختلف و ابتديت اشوف حاجات كتيرة مكنتش واخد بالي منها قبل كده و ساعدني كل ده علي تغيير اسلوب حياتي و نظرتي للاشياء.
معرفش اذا فيه اي حد بيستفيد اي حاجة من اللي بكتبه بس اللي متأكد منه ان اللي بكتبه مفيد اكتر للناس اللي مشتركة معايا في الفكر عشان ده بيحسسهم و بيحسسني اننا مش لوحدنا في الحياة و ده بيدي دعم معنوي مفيد للإنسان.

دوري و دور الناس اللي زيي انها زي ما بتكتب علي مواقع التواصل الاجتماعي انها تحاول تحرك الدنيا في الاتجاه التالت (لا ديني لا عسكري) و كل واحد علي قد اللي يقدر عليه يعني اكيد الشخص اللي بره مصر هيكون دوره مختلف عن واحد في مصر. انا و مجموعة من الأصدقاء في المكان اللي عايشيين فيه بنحاول نعمل حاجة مفيدة ممكن في المستقبل يكون ليها قيمة و نعرف نوصل للناس في كندا ان مصر فيها تيار تالت بيحاول يظهر في مصر يقف قدام التيارين الوسخين اللي موجودين حاليا.
طبعا اغلب اللي هيقرا الكلام ده ممكن يعتبرني انسان خيالي حالم عايش في عالم مش موجود بس انا شخصيا بستفيد و اعتقد ان وجودي ممكن يفيد غيري بأي شكل من الأشكال و في الاخر كل واحد هو قطرة في محيط ماشي في اتجاه التغيير الإجباري اللي محدش هيعرف يوقفه.

اخيرا، انا شايف اني كمسيحي مش راضي عن اللي بيحصل في مصر لازم اتكلم و أوضح موقفي بصراحة عشان اغلب الناس متخيلة ان كل المسيحيين راضيين عن اللي بيحصل ده مع اني متأكد ان ده كلام فارغ و اعرف مسيحيين كتير غير راضيين بس بيخافوا يعلنوا ده عشان منظرهم قدام بقية الناس ميتأثرش بس من وجهة نظري لازم يكون مفهوم للجميع ان المسيحيين مش كتلة واحدة ماشية ورا مجموعة من الناس او بتاخد رأيها من اي حد.

https://www.facebook.com/fkhair/posts/10155491754515029?pnref=story

Tuesday, 21 April 2015

مشاعر مختلفة يوم الحصول على الجنسية الكندية - شكرا كندا

21 ابريل 2015

نوفمبر ٢٠٠٨ - تقديم على هجرة كندا.
مايو ٢٠١٠ - اخدنا فيزا الهجرة لكندا
يوليو ٢٠١٠ - وصلنا كندا لاول مرة
ابريل ٢٠١٥ - اخدنا الجنسية الكندية
تاريخ مش قليل من أول التقديم على الهجرة لغاية النهاردة اللي اخدنا فيها الجنسية الكندية. مش قادر انكر إني مبسوط إني حاليا بني ادم معاه جنسية لبلد بتحترم الانسان و بتعامل المقيمين فيها بطريقة أحسن مليون مرة من بلدي الأصلي اللي كإنه طردتنا فعلا و أجبرتنا إننا نبعد عنها و كل يوم بتأكد لي إن حلم الرجوع ليها بيبقى اصعب من اليوم اللي قبله.
المشاعر متداخلة اولها إحساس بالعرفان لكندا اللي احترمتنا و اديتنا فرصة إننا نكون جزء من بناء وطن أنا فعلا بفتخر إني جزء منه دلوقتي و يكفيني إن في مراسم الجنسية, القاضي اللي اديتنا شهادة الجنسية أكدت على اهم مبادئ كندا بتديه لمواطنيها و هي حرية التعبير عن الرأي و المساوة من الجميع و حرية الاعتقاد و ممارسة العبادة و ذكرتنا إن زي ما لينا حقوق عند كندا علينا واجبات تجاه كندا و هي احترام القانون و دورنا في تنمية المجتمع الكندى و الحفاظ على قيمه.
في نفس الوقت, الواحد بيحس الألم من وطنه الام اللي مقدرش يحافظ علينا و طردنا بمعنى الكلمة. الهدف الوحيد اللي خلانا نقدم على الهجرة هو البحث عن حياة افضل لينا و لأولادنا بعد ما كبرنا في بلد لا تحترم ناسها و حياتهم ملهاش تمن ده غير غياب القانون اللي بيحمينا و يدينا ابسط حقوقنا ابسطها إن الواحد يبقى مطمن على مراته إنها تنزل تمشي في الشارع من غير ما يخاف عليها من القرف اللي بتشوفه كل البنات و الستات في شوارع مصر و إن الواحد يبقى مطمن على مستقبل و مستوي تعليم ولاده و يحس انه لما يعلمهم, يقدروا يكملوا حياتهم من غير أي مشاكل أو مساعدة زيادة. للاسف البلد طردتنا بمعنى الكلمة لما حسستنا إن مصر مش بلدنا و إني ماليش دور فيها عشان تتحرك لقدام بعكس كندا اللي في كل موقف بتحسسني إني جزء منها و إن أي حاجة بعملها في البلد هدفه مصلحة البلد و تقدمها.
أنا فعلا مش عارف افرح ولا ازعل بس بشكر ربنا على كل حاجة حصلت معانا في حياتنا و اتمني إني أشوف اليوم اللي اقدر أرجع فيه لمصر و اعيش فيها و أكون مطمن إن البلد هتديني كل حقوقي و تحقق المساواة للجميع و تحافظ على القانون اللي يمشي على الكل بنفس المعيار بس لازم اعلن إن كندا بقيت فعلا جزء مهم من هويتي اللي قدرت تزرعه فيا باحترامها ليا و توفيرها فرصة مهمة لأسرتي إني اعيش عيشة محترمة.

Wednesday, 15 April 2015

الإصلاحيون في المجتمعات المتشددة

15 ابريل 2015

من أكتر الكتب اللي غيرت في تفكيري كتير كتاب تاريخ الكنيسة القبطية. الكتاب مليان احداث عن تاريخ الكنيسة الأرثوذكسية في مصر اللي اغلب المسيحيين ميعرفوش عنه حاجات كتير.

الكتاب مقسم تاريخيا لأقسام كل قسم بيتكلم على قرن من الزمن و بيعرض البطاركة اللي كانوا موجودين في الفترة الزمنية دي و المشاهير الاقباط في نفس الفترة و علاقة الكنيسة بالدولة بالاضافة للجزء خاص بالبدع اللي ظهرت في كل قرن.
من الحاجات الظريفة في موضوع البدع دي إن فيه حاجات كهنة أو أساقفة نادوا بيها و اغلبية المسيحيين و قيادات الكنيسة شافت إنها تقع تحت بند البدع مع إنها في عصرنا هذا تعتبر حاجات عادية جدا.

من ضمن الحاجات دي, في القرن التاني عشر, كان فيه قس اسمه ابن ياسر القسطال. الراجل ده كان عايز يصلح بعض الطقوس و العادات الاجتماعية فمثلا شاف منعا للمشاكل الزوجية إن الخطيبان يشوفوا بعض قبل الجواز و قال إن الختان ليس فريضة دينية. الراجل ده بسبب افكاره تم اضطهاده من كثيرين من مسيحيين و تم طرده من الدير اللي كان مقيم فيه.

الراجل ده كان بيفكر بطريقة منطقية بس المنطق في وسط ناس متشددة و متمسكة بعادات من غير ما تفكر فيها, خليت الراجل ده يتم اضطهاده و طرده من الدير اللي كان عايش فيه و ده غالبا بيكون مصير أي واحد بيحاول يصلح أي حاجة شايفها غلط في مجتمع محافظ على التقاليد اللي بيعملها من غير ما يفكر إذا كانت مفيدة أو ملهاش لازمة.

أنا بكتب الكلام ده عشان اسقف كندا فكر إنه يعمل استطلاع رأي و يشوف رأي المسيحيين في موضوع مواعيد الاعياد و من ساعتها و أنا شايف هجوم عليه من ناس كتير و كل حجتهم إن ده اللي اتربينا عليه و اتعودنا عليه من زمان.

التاريخ بيعيد نفسه بأشكال مختلفة و مفيش أي شخص اصلاحي بيلاقي الطريق مفروش له بالورود و أكبر مثال لينا هو المسيح اللي دفع حياته تمن لافكاره الاصلاحية في وسط مجتمع متشدد زي المجتمع اليهودي المتمسك بتقليد الاباء تمسك اعمي من غير تفكير لدرجة إن اليهود حتى الآن ميقدروش يعملوا أي شيء يوم السبت حتى لو كان انهم يشغلوا أجهزة التكييف في يوم حار لو كان يوم سبت!

https://www.facebook.com/fkhair/posts/10155426102480029

Tuesday, 7 April 2015

عن الجواز المدني في دولة المواطنة و المساواة

7 ابريل 2015

كنت كتبت بوست عن الجواز المدني و غالبا  مكانش واضح قوي و كذا حد مش شايف مشكلة في إن مفيش قانون للجواز المدني للمصريين.
عشان نوضح المشكلة فين, محتاجين نتفق على حاجتين مهمين, لو متفقناش عليهم, متكلمش البوست عشان مالوش لازمة. الحاجتين دول:
1. حرية الاعتقاد بأي دين أو عدم الانتماء لأي دين مكفولة للجميع. يعني عادي جدا أي واحد يكبر دماغه من الاديان أو أي جزء مش مقتنع بيه في أي دين و هو حر في اختياره. 
2. المواطنون المصريين كلهم متساوون قدام الدولة في الحقوق و الواجبات.
لو إنت عندك مشكلة في أي حاجة من النقطتين دول, يبقى البوست ده في الزبالة. لو إنت مقتنع بالنقطتين دول و مش شايف اهمية للجواز المدني, يبقى كمل معايا.
لو افترضنا إن فيه أي راجل مصري و أي ست مصرية قرروا انهم مش مقتنعين بأي دين (و ده حقهم اللي إنت مقتنع بيه) و بعدين قرروا انهم عايزين يعملوا اسرة و يتعاملوا قدام الدولة كزوج و زوجة زيهم أي أي مواطن مصري و مواطنة مصرية, المفروض الدولة تسمح لهم انهم يتجوزوا و عشان الاتنين دول مش تبع أي دين, يبقى الحل هو انهم يتجوزوا جواز مدني و بكدة يكونوا قدام الدولة كزوج و زوجة و لما يخلفوا عيال, عيالهم يبقى ليهم حقوق في الدولة زي أي مواطنين تانينين و طبعا المفروض يكون ليهم نفس الخدمات اللي بتاخدها أي اسرة زي بطاقة التموين على سبيل المثال اللي بتختلف من إنسان لإنسان على حسب حالته الاجتماعية.
لو إنت شايف إن الجواز المدني ضد الدين, أو إن الدين بيحدد مين يقدر يتجوز مين و مش ميقدرش يتجوز مين, يبقى إنت بتفترض إن الانسان مالوش أي حق انه يبقى مش تبع أي دين أو حتى إنه ينتمي لدين معين بس ممكن يتصرف في حاجات معينة بطريقة مختلفة عن السائد في الدين اللي تبعه و ده ضد مبدأ حرية الاعتقاد اللي إنت كنت موافق عليه.
لو قررنا إن المؤسسات الدينية هي اللي بتقرر مين يتجوز مين و مش مينفعش يتجوز مين, هنلاقي إننا بنقر إن فيه دين أعلى من دي و هو الاسلام اللي بيبيح جواز المسلم من المسيحية مع إن الكنيسة بتكون شايفة إن المسيحية اللي بتتجوز المسلم هي إنسانة خاطئة و زانية و ده معناه إن الاديان في مصر مش متساوية.
طبعا أنا عارف إن اغلب المقتنعين بحرية الاعتقاد بيبصوا على الموضوع ده من ناحية واحدة و هي حرية ممارسة الطقوس الدينية من عدمها. يعني إنت اتولدت مسلم أو مسيحي و مش مقتنع بالاسلام أو المسيحية, حصل خير بس خليك مع نفسك و أعمل اللي إنت عايزه مع نفسك بس عايز تتعامل مع الدولة كمواطن طبيعي, ده مينفعش.
عشان الناس تريح دماغها, بتستسهل إنها متعلنش افكارها و تمثل على نفسها و على الدولة عشان تعرف تعيش زي بقية الناس التانية بدل ما يطلع عينهم عشان ياخدوا ابسط حقوقهم زي الجواز مثلا وتحول المجتمع تدريجيا لمجتمع منافق كل واحد بيمثل على الباقيين انهم عايشين في دولة طبيعية.
طبعا الشباب كبر دماغه من الجواز المدني و الجواز الشرعي و اخترعوا الجواز العرفي و بلاها وجع دماغ. قال يعني المتجوزين في مصر ليهم حقوق عشان يسعوا انهم يثبتوا انهم متجوزين قدام الدولة.

https://www.facebook.com/fkhair/posts/10155393992665029

Monday, 30 March 2015

عن حرب اليمن - كلاكيت تاني مرة

30 مارس 2015


أولا اشكر كل واحد شارك في استطلاع الرأي السريع ده اللي أكيد مش معبر عن أي حاجة عامة و لكنه بيديني اشارة بسيطة لاراء الناس اللي من دايرة معارفي أو على الاقل الناس اللي من خلفيات مقاربة ليا.


اغلب الكلام على حرب مصر في اليمن ينحصر حول 3 تبريرات:
- مصر بتدفع فاتورة المساعدات السعودية أو الخليجية في الفترة السابقة بعد عزل مرسي و ده متفق مع كلام السيسي لما قال "مسافة السكة" لو فيه خطر على أي دولة عربية في اشارة منه للدفاع عن أي دولة عربية.
- مصر رايحة اليمن عشان تؤمن مضيق باب المندب حتى لا تتأثر حركة الملاحة في قناة السويس
- مصر رايحة اليمن عشان تحد من الخطر الشيعي في منطقة الخليج العربي و ده معناه.
اغلب المشاركين في استطلاع الرأي ده قالوا إن السبب الحقيقي هو السبب الاول و أنا شخصيا متفق مع الرأي ده بس للاسف الرأي ده يعني بكل بساطة إن مصر لا تمكن اتخاذ قراراتها بنفسها و لو حصل تدخل بري, مصر هتدفع تمن الفلوس اللي اخديتها من الخليج بدم الجنود المصريين اللي هيروحوا هناك و التجربة السابقة في اليمن تؤكد إن لو حصل تدخل بري, الخسائر المصرية هتكون كبيرة جدا خاصة إن القوات المصرية مش مدربة على القتال في الطبيعية الجبلية كطبيعية اليمن.
الاقلية اللي شاركت في الاستطلاع ده شايفة إن السبب هو تأمين باب المندب و ده اعتقد إنه تبرير يقوله الناس حتى لا تتحطم الصورة الجميلة للسيسي لديهم. من وجهة نظري إن هذا السبب مالوش أي أساس من الصحة عشان معروف إن باب المندب مؤمن تماما بقواعد بحرية فرنسية و امريكية بعد حدوث عمليات القرصنة البحرية الصومالية.
الاختيار التالت و هو السبب الطائفي من وجهة نظري لو أي حد شايفه سبب مقبول, فهو بكل تأكيد لا يدري خطورته لأن إذا رأينا إنه سبب مقبول, فكيف نطالب بدولة مدنية تحترم جميع المعتقدات و تحترم جميع البشر بدون النظر للاديان؟؟ كيف اري إن الحرب طائفية في اليمن و اتوقع ان تعيش الأقليات الدينية في مصر في امان؟؟ لو كان السبب طائفي, فلماذا يقف النظام المصري مع نظام الأسد العلوي (القريب من الشيعة) في مواجهة داعش السنية و إذا كان النظام المصري ضد داعش, فكيف تتحالف داعش مع مصر في التحالف العربي ضد الحوثيين الشيعة؟؟ اعتقد إن هذا التبرير القائم على الطائفية القذرة للاستهلاك المحلي لجذب تأييد المتطرفين السلفيين و لكن للاسف اري مصريين اخرين يقبلون هذا التبرير و هذا يدل على عدم ادراكهم لخطورة هذا التوجه على المصريين نفسهم قبل أي شيء آخر.
للاسف, أنا حزين جدا إن يصل الحال بمصر (اكبر دولة في المنطقة في السابق) لهذا الحال الذي يدفعها للدخول في حرب لا تعنيها من قريب أو بعيد و السبب هو سياسة الشحاتة التي لا يعرف النظام المصري غيرها لإنه لا يملك القدرة على اقرار نظام محترم يعتمد على ثروات البلد الحقيقية و الكثيرة و لكنها للاسف مهدرة و منهوبة من مجموعة من الحرامية الذين لا يهمهم غير مصالحهم الشخصية و في داهية الشعب المصري المطحون.

https://www.facebook.com/photo.php?fbid=10155362734720029&set=a.10152265179420029.929001.800220028&type=1&theater

Thursday, 26 March 2015

هو امتى عيد القيامة؟؟

26 مارس 2015

من اوائل الاختلافات اللي حدثت بين الكنائس في العالم هو تحديد ميعاد القيامة. حدث هذا في القرن الثاني عندما قررت كنائس اسيا الصغرى (تركيا حاليا) و سوريا و اجزاء من العراق بالاحتفال بصلب المسيح و قيامته يومي 14 و 16 ابريل بغض النظر عن موضعهما من الاسبوع يعني ممكن ميكونش يومي الجمعة و الاحد و قالوا انهم اخذوا هذه القاعدة من الرسولين يوحنا و فيلبس لكن كنيسة الاسكندرية كانت شايفة إن لابد ان يكون تذكار الصلب و القيامة يومي الجمعة و الاحد و قالوا إن القاعدة دي من الرسولين بولس و بطرس و اختاروا أول جمعة و أحد بعد 14 ابريل ليكون تذكار الصلب و القيامة.

وقتها ماكانش فيه طوائف زي دلوقتي و فضلت كل مجموعة بتحتفل بذكري القيامة بالطريقة اللي شايفاها صحيحة حتى اجتمع مجمع نقية في القرن الرابع و قررت الكنائس ان تقوم كنيسة الاسكندرية بتحديد ميعاد القيامة و ده عشان الاسكندرية كانت متقدمة في علم الفلك و فضل الموضوع ده مستمر لغاية ما جه البابا جريجوري الثالث عشر سنة 1582 و غير التقويم المستخدم من اليولياني (نسبة إلى يوليوس قيصر) للتقويم الجريجوري نسبة ليه.

الفرق بين التقويم الجريجوري عن اليولياني بكل بساطة إن البابا جريجوري رأي إن التقويم اليولياني مش مضبوط عشان المفروض الربيع يبدأ يوم 21 مارس و هو اليوم اللي يتساوي فيه الليل مع النهار و لكن في وقتها (1582) كان تساوي الليل مع النهار يحدث في 11 مارس فقرروا  استقطاع عشرة أيام من سنة 1582م ، فجعل يوم الجمعة الخامس من أكتوبر يساوي يوم الجمعة الخامس عشر من اكتوبر يعني الناس ناموا يوم الجمعة 5 اكتوبر صحيوا يوم السبت 16 اكتوبر و طبقت فرنسا و ايطاليا و اسبانيا و البرتغال هذا التغيير و تبعتها بقية دول العالم حتى طبقته مصر في سنة 1913 وقت الاحتلال الانجليزي و استمرت الكنيسة المصرية في استخدام التقويم القديم و عشان كده بقي فيه فروقات بين الكنيسة الغربية و الكنائس الشرقية.

حصلت محاولات توحيد الاعياد بين الكنائس أشهرها سنة 1997 لما اجتمعت الكنائس في حلب بسوريا و حاولوا يوحدوا الطريقة المستخدمة في حساب يوم أحد القيامة بس طبعا كل كنيسة تمسكت برأيها و فشلت المحاولة دي و حاولوا مرة تانية في 2008 و 2009 بس برضه اتفقوا علي الا يتفقوا كالعادة.

اللي يغوص في التاريخ و الفروقات بين الكنائس أو المذاهب هيلاقي إن خلاف صغير حدث في الماضي بيكبر مع الوقت و في الاخر الخلافات بتزيد مع الوقت مع إن الهدف واحد دايما بس حب الزعامة بيقف عائق امام توحيد الاشياء البسيطة عشان يفضل كل واحد شايف إنه الصح.

اتمني إن اري اليوم اللي يتفق فيه الناس على أي حاجة بسيطة حتى لو كان توحيد ميعاد الاحتفال بأي عيد.

https://www.facebook.com/fkhair/posts/10155348680950029

Thursday, 19 March 2015

المسيحيين بيقولوا "لأ" فإحنا هنقول "نعم" - عن استفتاء مارس الكارثي

19 مارس 2015

في ذكري استفتاء مارس 2011 اللي ابتدينا معاه المهازل السياسية اللي مستمرة حتى الآن, بفتكر اللي حصل فيها و كمية الهبل اللي شفته من كل الاطراف تقريبا, بس بحكم إني مسيحي, ركزت أكتر مع اللي عملته الكنيسة ايامها و عرفت نتيجة الاستفتاء مسبقا قبل اعلان النتيجة بعد ما شفت الشحن اللي عملته الكنيسة للاقباط عشان يقولوا لأ للتعديلات الدستورية و خاصة إني شفت فيديو كارثي للانبا رافائيل من كنيسة العذراء مدينة نصر بيزق الناس عشان ينزلوا و يقولوا لأ (الفيديو في أول تعليق) و طبعا الجوامع ماسكتتش و شحنت المسلمين لقول "نعم" عشان هوية مصر ماتضيعش و الكلام المحفوظ ده اللي كان أحد اسبابه اللي الكنيسة قالته للمسيحيين. 

أنا طبعا لما شفت الكلام ده, عرفت على طول إن الاستفتاء ده هيعدي بنتيجة كبيرة لإني عارف إن فيه مصريين كتير بيشوفوا المسيحيين بيقولوا إيه و بيعملوا عكسه تماما و حصل اللي توقعته و كذا واحد اعرفه قاللي بعد الاستفتاء إنه سمع ناس واقفة في طابور الاستفتاء و بيقولوا انهم هيقولوا "نعم" عشان الكنيسة بتقول "لأ". هو ده الواقع اللي كلنا عارفينه إن فيه ناس كتير من النوعية دي. 

المهم طلعت نتيجة الاستفتاء بالنتيجة المقرفة دي و أنا مازلت مقتنع إن الكنيسة بدورها في توجيه المسيحيين كانت من أحد العوامل اللي رفعت نسبة "نعم" قدام نسبة "لأ" و معاهم الكلام عن الاستقرار اللي لسة المصريين بيدوروا عليه مع كل استفتاء أو انتخابات من ساعتها. 

بعد الاستفتاء, حاولت اوصل لأي حد من الكهنة عشان افهمه إن اللي بتعمله الكنيسة مش صح و نتايجه بتكون سيئة و فعلا كلمت كذا كاهن و مسيحيين كتير عشان أحاول افهمهم إن الاسلوب ده مش صح بس طبعا كانت ردود الافعال إني مش فاهم حاجة (زي اللي بيتقاللي اليومين دول) و إن المسيحيين لازم يكونوا كتلة واحدة و إن المسيحيين في ايدهم يوقعوا أو ينجحوا أي حاجة بتكتلهم ده (شوف الصدف يا مؤمن, الاخوان بيقولوا كده برضه على المسيحيين), و من ساعتها وانا عمال اهاتي و لا حياة لمن تنادي.

الصراحة استفتاء مارس كان أول أول درس ليا عشان ابتديت افهم اللي بيحصل في مصر و دور الدين الكارثي في تفريق الناس عن بعض و استخدام السلطة للدين لتفريق الناس عن طريق مبدأ "فرق تسد" الشهير.

الحمد لله السيسي حل كل المشاكل دي و بقى الجامع و الكنيسة بيقولوا اللي هو عايزه و ريحنا من وجع القلب ده و صالح الكنيسة على السلفيين و اصبح السلفيين فصيل وطني اصيل في نظر الكنيسة و انضم الاقباط لحزب النور عشان حزب النور يدخل البرلمان و الاستفتاءات و الانتخابات رجعت للارقام الحلوة بتاعة زمان ام 97% و الحاجات الجميلة دي بتاعة زمن الماضي القذر الجميل.

https://www.facebook.com/fkhair/posts/10155318791430029