المسيحيين بيقولوا "لأ" فإحنا هنقول "نعم" - عن استفتاء مارس الكارثي

19 مارس 2015

في ذكري استفتاء مارس 2011 اللي ابتدينا معاه المهازل السياسية اللي مستمرة حتى الآن, بفتكر اللي حصل فيها و كمية الهبل اللي شفته من كل الاطراف تقريبا, بس بحكم إني مسيحي, ركزت أكتر مع اللي عملته الكنيسة ايامها و عرفت نتيجة الاستفتاء مسبقا قبل اعلان النتيجة بعد ما شفت الشحن اللي عملته الكنيسة للاقباط عشان يقولوا لأ للتعديلات الدستورية و خاصة إني شفت فيديو كارثي للانبا رافائيل من كنيسة العذراء مدينة نصر بيزق الناس عشان ينزلوا و يقولوا لأ (الفيديو في أول تعليق) و طبعا الجوامع ماسكتتش و شحنت المسلمين لقول "نعم" عشان هوية مصر ماتضيعش و الكلام المحفوظ ده اللي كان أحد اسبابه اللي الكنيسة قالته للمسيحيين. 

أنا طبعا لما شفت الكلام ده, عرفت على طول إن الاستفتاء ده هيعدي بنتيجة كبيرة لإني عارف إن فيه مصريين كتير بيشوفوا المسيحيين بيقولوا إيه و بيعملوا عكسه تماما و حصل اللي توقعته و كذا واحد اعرفه قاللي بعد الاستفتاء إنه سمع ناس واقفة في طابور الاستفتاء و بيقولوا انهم هيقولوا "نعم" عشان الكنيسة بتقول "لأ". هو ده الواقع اللي كلنا عارفينه إن فيه ناس كتير من النوعية دي. 

المهم طلعت نتيجة الاستفتاء بالنتيجة المقرفة دي و أنا مازلت مقتنع إن الكنيسة بدورها في توجيه المسيحيين كانت من أحد العوامل اللي رفعت نسبة "نعم" قدام نسبة "لأ" و معاهم الكلام عن الاستقرار اللي لسة المصريين بيدوروا عليه مع كل استفتاء أو انتخابات من ساعتها. 

بعد الاستفتاء, حاولت اوصل لأي حد من الكهنة عشان افهمه إن اللي بتعمله الكنيسة مش صح و نتايجه بتكون سيئة و فعلا كلمت كذا كاهن و مسيحيين كتير عشان أحاول افهمهم إن الاسلوب ده مش صح بس طبعا كانت ردود الافعال إني مش فاهم حاجة (زي اللي بيتقاللي اليومين دول) و إن المسيحيين لازم يكونوا كتلة واحدة و إن المسيحيين في ايدهم يوقعوا أو ينجحوا أي حاجة بتكتلهم ده (شوف الصدف يا مؤمن, الاخوان بيقولوا كده برضه على المسيحيين), و من ساعتها وانا عمال اهاتي و لا حياة لمن تنادي.

الصراحة استفتاء مارس كان أول أول درس ليا عشان ابتديت افهم اللي بيحصل في مصر و دور الدين الكارثي في تفريق الناس عن بعض و استخدام السلطة للدين لتفريق الناس عن طريق مبدأ "فرق تسد" الشهير.

الحمد لله السيسي حل كل المشاكل دي و بقى الجامع و الكنيسة بيقولوا اللي هو عايزه و ريحنا من وجع القلب ده و صالح الكنيسة على السلفيين و اصبح السلفيين فصيل وطني اصيل في نظر الكنيسة و انضم الاقباط لحزب النور عشان حزب النور يدخل البرلمان و الاستفتاءات و الانتخابات رجعت للارقام الحلوة بتاعة زمان ام 97% و الحاجات الجميلة دي بتاعة زمن الماضي القذر الجميل.

https://www.facebook.com/fkhair/posts/10155318791430029

‏٢٨ يناير - ذكريات لا تنسي

28 يناير 2015

زي اليومين دول من اربع سنين, كنت في الاسكندرية عشان أجازة نص السنة و كنت متابع اللي حاصل في البلد بقالي فترة بس ماكنتش مشارك في أي حاجة ليها علاقة بالدعوات للنزول يوم 25 يناير أو جمعة الغضب بس قبل يوم الجمعة, كنت متوقع السيناريو بتاع جمعة الغضب و قلت لكذا واحد أعرفه إن الشرطة مش هتقدر تصمد قدام الناس اللي هتنزل يوميها عشان أنا كنت عارف كمية الغضب اللي كانت عند الناس و توقعت إن الجيش هينزل الشوارع بعد ما الشرطة تفشل في السيطرة على الاوضاع.

المهم عشان أنا ماكانش ليا في أي حاجة و كنت مستني السنة الدراسية تخلص عشان ابني يخلص السنة بتاعته و أسافر على كندا, مفكرتش اشارك في أي مظاهرة من المظاهرات و لكني توقعت إن الدنيا هتتقلب و كلمت كذا واحد صاحبي قلتلهم يركنوا عربياتهم في أي مكان أمان عشان أنا كنت عارف إن احداث شغب هتحصل و اتفاجئت إن فيه ناس كتير من صحابي ماكانوش عارفين أي حاجة عن الدعوات للنزول و لكنهم سمعوا كلامي و ركنوا عربياتهم في أماكن امان و أنا رحت ركنت عربيتي في نادي سموحة و نسيتها طول الفترة اللي بعدها.

كل ده وانا ماليش دعوة بأي حاجة و متابع بس اللي بيحصل و توقعاتي كلها بتأكد إن اللي هيحصل المرة دي مش عادي. المهم يوم الجمعة 28 يناير بالليل الشرطة اختفت من الاسكندرية و الجوامع ابتديت تدعوا الناس للنزول في لجان شعبية عشان يحموا المنطقة.

سألت بواب العمارة إذا كان عايزني أنزل اقف معاه قدام العمارة بس هو قاللي إنه مالوش لازمة عشان ولاده و صحابهم هيقفوا و لو احتاجوا حاجة هيقولوا للناس.

أنا كنت قاعد عند حماتي و كانت العمارة في وش الكنيسة اللي بروحها و لقيت الفراش وكم واحد من الكنيسة محتاسين و مش لاقيين أي حد يقف معاهم فكلمت واحد من اللي هناك و عرضت عليه إني أنزل لو محتاج مساعدة و قاللي لو تقدر تنزل, يا ريت عشان اغلب الشباب اهاليهم مانعنهم من النزول عشان خايفين عليهم.

قررت إني هانزل و اللي يحصل يحصل و نزلت و رحت عند الكنيسة اقف قدامها. في الوقت ده كل الشباب اللي في المنطقة نزل و كل واحد نازل بسلاح شكل. اللي نازل بسيف و اللي نازل بغطاء غسالة عامله درع و اللي نازل بشومة و عشان المنطقة دي منطقة متوسطة مش من المناطق الراقية, كانت أشكال الشباب مش من الاشكال الكيوت و منهم اللي كان لسة هاجم على محل بيرة و شربوا كل ازايز البيرة و عملوا بالفوارغ مولوتوف و كل ده عادي وانا في وسط الناس كإني بتفرج على فيلم بس المرة دي أنا كنت بشارك فيه.

الحمد لله اليوم ده عدى على خير بس حصلت حاجات كتير مكنتش بفكر فيها خالص و من يوميها و أنا بحاول افهم العالم اللي أنا عايش فيه و لسة بتعلم حاجات كتير, الحاجات دي:

- لقيت ناس معايا في اللجان الشعبية بيدافعوا عن مبارك و الكلام اللي اتهرينا منه كتير زي إنه حمي مصر من الحروب و الحاجات دي اللي أنا كنت واقف بسمعها بقمة الاستغراب و طبعا حاولت افهم الناس دي إن مبارك رئيس قذر و فاسد بس محدش طبعا كان بيسمع أي حاجة أقولها.

- أكتر حاجة حسستي إن فيه أمل في الحياة إن الناس في المنطقة كلهم كانوا كتلة واحدة و كانوا فعلا خايفين على بعض. طبعا المسيحيين كانوا متوقعين إن الكنايس تتهاجم عشان مفيش أمن بس الصراحة أنا شفت بعيني إن المسلمين اللي في المنطقة كانوا خايفين على الكنيسة زينا و أكتر.

- التعاون بين الناس في المنطقة كان هايل و المجموعات المختلفة عملت طرق للتواصل بينها عشان العربية اللي تتفتش, تعدي بعد كده من غير تفتيش و فعلا كان الوضع أمان في المنطقة لدرجة إن جت مجموعة في المنطقة للكنيسة و قالت لنا إن لو شوفتوا أي هجوم أو خطر, استخدموا جرس الكنيسة عشان تنبهونا و احنا هنيجي على طول.

الصراحة بعد ما اليوم ده عدي على خير, اتأكدت إن المصريين من جواهم ابيض و اغلبهم جهلة بس الجهل مش معناه إنهم عدوانيين أو اشرار. الشخص الجاهل عامل زي الاسفنجة, سهل قوي يمتص أي حاجة تتقال له طالما مصدرها موثوق فيه, يعني اللي كان بيدافع عن مبارك يوميها كان بيردد كلام سمعه من التلفزيون و طبعا كلامي كان مكانه الزبالة بس في نفس الوقت لما الجوامع طلبت من الناس ينزلوا يحموا المنطقة, كان الناس كلها في قمة الالتزام و الخوف على بعض.

كل لما أفتكر يوم 28 يناير, افتكر برضه حالة الفوضى اللي حصلت في لندن لما غابت الشرطة لفترة و من ساعتها وانا شايف إن المصري إنسان طبيعي زيه زي أي إنسان تاني في أي بلد تاني. الفكرة في القائد اللي بيقوده و بـيكون افكاره, بس للاسف مش لاقيين القادة اللي يقودوا الشعب ده في الطريق الصح حتى الان.

‫#‏ذكريات_لا_تنسي‬
‫#‏جمعة_الغضب‬
‫#‏٢٨_يناير‬

https://www.facebook.com/fkhair/posts/10155126624685029?pnref=story

شهادة حق عن احداث مصر بعد يناير 2011 و اعرفها بنفسي

30 نوفمبر 2014

بعد حكم البراءة اللي كان متوقع، اكيد الاعلام و النظام هيروج لفكرة ان الاخوان هما اللي قتلوا المتظاهرين ايام مظاهرات يناير ٢٠١١ و طبعا هنلاقي ناس كتير ماشيين ورا الكلام ده و مع الوقت هتصبح حقيقة زي بقية الاكاذيب اللي الشعب صدقها من كتر ترديدها في الاعلام و عشان كده لازم كل واحد عنده اي معلومة عن ثورة يناير يوثقها و يقول شهادة حق عشان الحقيقة تفضل عايشة وسطنا.

كل حاجة انا اعرفها عن احداث مصر المختلفة اللي هعرضها عن طريق ناس و أصدقاء شخصيين اعرفهم و كانوا موجودين في قلب الأحداث. الناس دي دم و لحم مش كلام في التليفزيون مالوش اي دليل مادي.

١. ٢٨ يناير:
ليا واحد صاحبي (مش اخواني) لما شاف بطش الشرطة ضد المتظاهرين في ٢٥ يناير قرر انه ينزل ميدان التحرير يوم ٢٨ يناير بعد ما شاف ان في بنات ارجل منه نزلت الشارع و مش خايفة. المهم صاحبي ده لما نزل الميدان، شاف بعينه عربيات الجيش و هي شايلة ذخيرة و بتنقلها للداخلية اللي كانت بتضرب رصاص حي علي المتظاهرين و شارك هو و غيره من الشباب اللي هناك في منع العربيات دي من الوصول للداخلية و قلبوا عربية من عربيات الجيش.

٢. ٢ فبراير (موقعة الجمل):
ليا واحد صاحبي (مش اخواني) كان موجود في ميدان التحرير من اليوم اللي قبله و كان اغلب الناس اللي في الميدان ابتدوا يسيبوا الميدان بعد خطاب مبارك العاطفي اللي وعد فيه بعدم ترشحه هو او ابنه للرئاسة في سبتمبر. يوم ٢ فبراير الضهر صاحبي شاف بلطجية الحزب الوطني و علي فكرة دول اشخاص معروفة لسكان المنطقة و هما داخلين الميدان و حصل اللي حصل يومها. و شفنا كلنا ازاي رجال الجيش وسعوا للناس دي انها تدخل الميدان. معرفش مين اللي عمل احداث العنف خلال فترة الليل بس ده اللي اعرفه و متأكد منه عن احداث موقعة الجمل في فترة الصبح.

٣. اقتحام مقرات أمن الدولة:
ليا واحد صاحبي (مش اخوان طبعا) دخل مقر أمن الدولة في مدينة نصر بعد ما رجال الجيش فتحوا للناس الأبواب و لقي كام تقرير خايب عن كام ممثلة و سلم التقارير دي لرجال الجيش و هو خارج

٤. ٩ أكتوبر (مجزرة ماسبيرو)
الحادثة دي حصلت بعد ما سيبت مصر و سافرت لكندا و شفت كل الفيديوهات اللي بتوضح ان مدرعات الجيش دهست المتظاهرين و قتلوا اللي اتقتلوا و منهم مينا دانيال. بالصدفة اتعرفت علي صديق مصري (بطل بمعني الكلمة من وجهة نظري). الراجل ده كان شاهد علي الأحداث في ماسبيرو و حمي شوية مسيحيين في مكان عمله و ده كلفه انه خسر كل ما يملك من اعمال في مصر عشان اتصرف بإنسانية و حمي ناس اغراب ميعرفهمش.

٥. مجزرة فض رابعة:
ليا واحد زميل و صديق عزيز كان شغال في الخليج و نزل مصر اجازة وقت اعتصام رابعة و قرر انه يزور الاعتصام عشان يعرف اذا كان الكلام اللي بيتقال علي اللي بيحصل فيه حقيقي و لا كلام فارغ و دخل الاعتصام في اليوم اللي قبل الفض و ماشفش اي حاجة مريبة علي حد روايته لأصدقائه اللي انا اعرفهم من شركتي القديمة في مصر. بعد ما رجع بيته و صحي الصبح علي خبر فض الاعتصام، اخد عريبته و اتجه ناحية ميدان رابعة و عند المنصة أتقتل برصاص حي. اللي يكمل القصة دي واحد صاحبي حكي قدامي (بحسن نية) انه قابل أصدقاء ليه من ضباط الشرطة اللي اشترك بعضهم في فض الاعتصام و أكد ان رجال الداخلية كانوا داخلين يفضوا الاعتصام بهدف الانتقام من الاخوان علي اللي عملوه فيهم في الفترات السابقة.

دي كل حاجة اعرفها عن احداث اعتقد انها مهمة في تاريخ مصر المعاصر و معلش مش هصدق اي كلام مختلف بيتقال في الاعلام اللي اصبح بالنسبة ليا جهاز وسخ مالوش اي مصداقية عندي.

عشان الاخوان ميظيتوش، انا ضد الاخوان سياسيا لابعد الحدود و ضد اي واحد بيقول ان مرسي لسة معاه الشرعية و شرعية مرسي و جماعته سقطت نهائيا بالنسبة ليا لما شفته زي ما شافه ملايين المصريين و هو بيحط ايده في أيد شيوخ سلفية كفرت المعارضين ليه و احلت دمهم ده غير تهديدات الاخوان و مؤيديهم بالعنف ضد الشعب و اعتقد ان الفيديوهات منتشرة في كل مكان اللي بتدين عنفهم. ده مش معناه ان الدولة تقتلهم بدم بارد عشان ده بيزود المشكلة اكتر من وجهة نظري بس بالنسبة ليا الاخوان مينفعش يرجعوا للحياة السياسية و وجودهم علي الساحة السياسية اكبر عائق امام اي قوي مدنية تسعي لأحداث اي تغيير في البلد.

اخيرا، انا انسان حقير جبان اكبر حاجة عملها هو انه نزل مع اللجان الشعبية اول كام يوم بعد انسحاب الشرطة في يناير ٢٠١١ و وقفت قدام كنيستي في الاسكندرية و شفت بعيني قد ايه أهل المنطقة كانوا خايفين اكتر مني علي سلامة الكنيسة و ده يثبت ان الشعب المصري من جواه طيب بس للاسف في ناس مصالحها وسخة بتعرف تلعب في دماغ الشعب و تفرق بين الناس و بعضها.

دي شهادة حق عن الأحداث اللي ذكرتها و هفضل افتكرها و هفكرها لعيالي عشان الحقيقة متموتش و متأكد ان فيه غيري كتير هيعمل ده.

و اخيرا مبروك البراءة لمبارك و العادلي و كل القذرين اللي معاهم

‏شهادة_حق#‬

‫#‏الحق_في_بلدي_بقي_شيء_نادر_الوجود

https://www.facebook.com/fkhair/posts/10154862657030029

‫

بطل من ابطال مجزرة ماسبيرو - محمد جوهر

9 أكتوبر 2014

على قد ما اليوم ده مناسبة جميلة ليا, ولكني هفضل افتكر اللي حصل في نفس اليوم من تلات سنين في ماسبيرو. ناس كتير بتتكلم عن الموضوع ده في نفس الوقت في السنة بس أنا حابب اتكلم على شخص مهم (اتعرفت عليه بالصدفة في كندا). الراجل ده ضحي بكل حاجة ليه في مصر تقريبا وعرض حياته شخصيا للخطر عشان يحمي شوية ناس مايعرفهمش ولا عمره شافهم قبل كده.

الناس دول ماكانوش من دينه بس هو مفكرش هم مين ولا دينهم إيه عشان يحميهم أو لأ. الراجل ده مستقبله المهني في مصر انتهى بعد ما كان عنده اكبر وكالة أخبار في مصر ويمكن في الشرق الأوسط كله وكل ده عشان هو انحاز لانسانيته مش لأي حاجة تانية.

الراجل ده أنا اتعرفت عليه بالصدفة وعرفت قد إيه هو متألم من تصرفات ناس كتير كانت بتدين المجزرة دي وقت حدوثها و دلوقتي بيقولوا عفى الله عما سلف, بس أنا عامة عايز اقوله إن لسة فيه ناس واقفة معاه في نفس الصف ومش هتنسى اللي حصل ولا هتزيف الحقائق زي مافي ناس بتحاول تعمل.

أشكر الظروف اللي ختلني اتعرف على الشخص اللي عنده انسانية اللي للاسف اختفت عند ناس كتير في الفترة الأخيرة و تحية من قلبي لكل واحد لسة بتحركه انسانيته مش مصالحه زي الراجل ده.

وربنا يعزي كل أهالي الشهداء والضحايا في أي حادثة حصلت في أي وقت ضد أي طرف ضعيف من أول يناير 2011 لغاية النهارده.

ده لينك للراجل الانسان اللي ضحى بمستقبله في مصر وحياته عشان الناس اللي مايعرفهمش وهو بيحكي الحكاية زي ماحصلت معاه:

http://globalnews.ca/news/1147452/egypts-televised-revolution

‫#‏محمد_جوهر‬

‫#‏الرجل_الانسان

https://www.facebook.com/fkhair/posts/10154678038195029

‬